Dalawang magkasunod na Linggo, ekslusibong ipinalabas sa The Buzz ang kasalan ng dalawa sa news anchors ng ABS-CBN News & Public Affairs, walang iba kundi sina Bernadette Sembrano at Nina Corpus.

INDEPENDENCE DAY WEDDING. Last Sunday, June 22, ipinalabas sa The Buzz ang ekslusibong coverage ng kasal ni Bernadette kay Emilio Aguinaldo IV, apo ng unang presidente ng Pilipinas na si Emilio Aguinaldo, noong Independence Day, June 12. Nagkakilala sina Bernadette at Orange, palayaw ng mister niya, noong Independence Day, 2006 sa Cavite. Nagtatrabaho noon si Bernadette bilang news anchor.

Sumunod na taon, muling nag-cover ng Independence Day sa Cavite si Bernadette at muli silang nagkita ni Orange. Doon nagsimula ang love story nina Bernadette at Orange. Nang sumunod na taon, nagpasya na ang magkasintahan na lumagay na sa tahimik. Sa kasalukuyan ay vice-mayor ng Cavite si Orange.

"Thirty minutes to go, excited na ako. Kinakabahan na masaya," pahayag ni Bernadette habang kinukunan ng camera ng The Buzz sa araw ng kanyang kasal. "Kinakabahan ako, kasi mag-aasawa na ako after 32 years! Ha-ha-ha!"

Dagdag pa ni Bernadette, "It's worth the wait."

Naniniwala sina Bernadette at Orange na malaki ang kinalaman ng bayaning lolo ni Orange na si Emilio Aguinaldo sa kanilang pagkikita hanggang sa kanilang pag-iisang dibdib. Bukod nga raw sa "Indie" na tawagan nila sa isa't isa, mismong Independence Day ang napili nilang araw para sa kanilang kasal.

Filipiniana ang napili nilang motif for the wedding at ginanap ang kasal sa Chapel on the Hill sa Don Bosco Nasugbu, Batangas. Sa Sonia's Gardens sa Alfonso, Cavite, naman ginanap ang reception. At matapos ang kasal, kaagad lumipad patungong San Francisco, California, ang bagong kasal para sa kanilang honeymoon.

Feeling ni Bernadette, itinadhana sila ni Orange para sa isa't isa. Pati plate number ng kanyang sasakyan ay may numerong 6-1-2 o June 12.

MARRIED IN PARIS. Kahapon naman, June 29, sa The Buzz ay ipinakita ang kasal naman ng TV Patrol news reporter na si Nina Corpus sa Studio 23 executive producer na si Vince Rodriguez.

Bongga ang kasal ni Nina dahil sa Paris, France, ginanap ito.

May 20 naman ng taong ito nang magpakasal si Nina sa kanyang boyfriend na si Vince sa isang 11th Century Gothic Church sa Paris.

"It was a dream wedding talaga. Hindi namin akalain na magagawa namin yun sa isang lugar na ganun kalayo at napakaganda.

"It's an old church, one of the oldest in Paris. The gown was made by my friend Debbie Go. Pati yung entourage, siya yung gumawa."

Saksi sa kanilang pag-iisang dibdib ang kani-kanilang pamilya at malalapit na kaibigan na lumipad pa papuntang Paris.

"It was perfect. I got so emotional while walking down the aisle. Kasi nandun yung mga close friends mo and family. Mga 80 guests flew from here sa Philippines, U.S., and Canada.

"Yung kanta, ‘Ave Maria.' ‘Tapos si Vince pagtingin ko nung papalapit na rin ako sa kanya umiiyak din siya.

"It's one of the happiest moments sa buhay naming dalawa. Right after the wedding, tumawid lang kami. Siguro 20 steps lang papunta sa reception namin."