Sa totoong buhay, mayroong alagang aso na Pomeranian si Mona Louise Rey.

Sa bago niyang teleserye sa GMA-7, si Mona ay mayroon ding kasa-kasamang aso na si Princess, isang mixed breed ng Golden Retriever at English Cocker Spaniel.

Ito ang dahilan kung bakit hindi raw siya nahihirapan sa bago niyang pinagbibidahan na primetime series, ang Aso ni San Roque.

Eight years old pa lang si Mona nang gawin niya ang Munting Heredera sa GMA-7.

Mula noon, masasabing hindi na siya nabakante sa paggawa ng mga teleserye.

Sa presscon ng Aso ni San Roque noong Lunes ng gabi, September 3, nakausap ng PEP.ph (Philippine Entertainment Portal) at iba pang entertainment press si Mona.

Banggit niya agad na pag-aartista raw talaga ang hilig niya noong araw pa.

“Masaya po ako,” sabi niya.

“At saka, noong bata pa po ako, dream ko na po talaga yun. 'Tapos, may pinapanood po kami ng ate ko, umaarte po ako sa salamin.”

TALENT EARNINGS. Bago ang Munting Heredera, anim na taon pa lang si Mona ay gumagawa na siya ng TV commercials.

Ang perang kinikita niya ay nilalagay raw niya sa bangko.

Pero nang biruin namin siya kung may milyon na ba ang pera niya sa bangko, natawa ito at sabay sabing, “Hindi ko po alam, e.

“Hindi ko po siya natsi-check kasi, wala po akong time na mag-check.

“At saka, yung pera ko po, pang-aral ko po. Pambili ko po ng ibang gamit sa school para sa akin,” dugtong pa niya.

Ngayong walong taon na si Mona, may hilig na siya sa gadgets.

Sabi niya, “Nakabili na po ako ng iPad, cellphone, iTouch—marami na po, e.