Bago pa man sumali sa showbiz ay health conscious na si Enchong Dee, o Ernest Lorenzo Dee sa totoong buhay.

Ang kanyang fit physique ang magpapatunay kung paano niya inaalagaan ang kanyang kalusugan.

Nakapanayam ng PEP.ph (Philippine Entertainment Portal) at ilang entertainment press si Enchong noong Sabado, Enero 7, sa Nutrilite's Living in Full Color event sa Market! Market! Mall sa Taguig City.

Si Enchong ang bagong brand ambassador ng nasabing produkto.

Simple lang ang daily health regimen ng actor: "Dapat you constantly drink water, kung lalagpas ng eight servings okay lang 'yon.

"Second is tamang bilad lang sa sunlight.

"And third, ihiwalay mo lang 'yong taba sa mga kinakain mo."

Wala naman daw siyang diet plan na sinusunod, at kinakain lahat ng gusto niyang pagkain.

Pero, sinisiguro niyang nabu-burn ito sa pamamagitan ng exercise at pagkakaroon ng active lifestyle.

Bukod kasi sa pagpunta sa gym, si Enchong ay active din sa sports, gaya ng running, biking, at swimming.

Kung tutuusin, kayang-kaya niya ang sumali sa Ironman Triathlon.

"Ang daming [invitation]," ang sabi ng aktor. "Like 'yong sa Camarines Sur, mayro'ng tatlong team na nag-offer sa akin to join their team.

"Kaya lang because of work, hindi ko talaga [kaya]."

Ngunit, kung papipiliin siya, swimming pa rin ang pinakagusto niyang sport.

SWIMMING.  Miyembro si Enchong ng Philippine National Swimming Team na lumahok sa SEA Games at Asian Games noong 2006.