Madalas nating nakikita si Sam Milby sa pelikula at sa mga teleserye na gumaganap ng iba't-ibang mga roles. Isama na natin dito ang mga iba't-ibang commercials na kanyang ginawa.

Ngunit kaninang tanghali, January 28, isang naiibang Sam ang nasaksihan ng ilang miyembro ng press.

Nadatnan ng PEP (Philippine Entertainment Portal) ang aktor na naka-dirt bike gear sa motocross race track sa likod ng SM Bicutan. Sumakay ito sa isang dirt bike at humarurot sa race tracks.

Pagkaraan ng ilang minuto na paikot-ikot sa track, bumalik si Sam sa tent. Dito siya na-interview ng PEP bago siya nakipagsabayan ulit sa ibang mga riders noong hapong iyon.  

Ayon kay Sam, kinuha niya ang pagkakataon na makapag-motocross ulit habang hindi pa nagsisimula ang movie na gagawin niya kasama si KC Concepcion.

"This year is my third time pa lang. I want to take the advantage of the time I have habang hindi pa nag-start yung [shooting ng movie].  Kasi pag nag-start na yung movie wala na, wala nang time," aniya.

HOW IT  STARTED. Kinuwento ni Sam kung paano siya nagsimula sa motocross.

"Nag-skating na ako nung 11 years old ako. Natuto ako mag-dirt bike nung mga 12 [years old]. Nung nag-stop ako mag-figure skating, nag-race na ako."

Nakatulong din daw na mahilig mag-motocross ang kanyang tatay at dalawang kapatid.

"It's in the blood," aniya.

Bakit ito ang napili niyang sport?

"I don't know, when my dad let me try it, na-hook ako kaagad," ang mabilis na tugon ni Sam.

Maraming klase ng sports ang nasubukan ni Sam.  Ilan sa mga ito ay golf, hockey, tennis, soccer, volleyball, at wakeboarding.

"I even did a little bit of gymnastics!" natatawang kwento niya.

Nang tanungin kung ano ang pinagkaiba ng mga ibang sports sa motocross, ngumiti ito at sinabi, "I like the adrenaline rush. I like the speed."