Bukod kasi mismo sa birthday celebrant, ay ilang araw na ring tinututukan ng entertainment press ang magiging official statement ni Lani kaugnay sa pagpapakasal ng anak na si Inah Revilla sa murang edad na 18-years-old.

STAND-OUT SUITOR. Noong nakaraang linggo ay kinumpirma ng manager ni Lani na si Lolit Solis ang balitang pagpapakasal ni Inah sa non-showbiz boyfriend nito, na ikinagulat ng marami sa dahilang napakabata pa ng dalaga para lumagay sa tahimik.

In fact, sariwa pa sa isipan ng publiko ang naging debut ni Inah last year, October 13, na idinaos sa One Esplanade Place sa Pasay City. During the party ay tinanong pa si Inah ng PEP (Philippine Entertainment Portal) kung ready na ba siyang mag-boyfriend ngayong nasa legal age na siya.

"May mga suitors naman ako pero hindi naman sila priority talaga. Alam naman nina Daddy at Mommy na may mga nanliligaw at kilala naman nila silang lahat," sagot nito.

Pero hindi naman itinago ng dalaga na meron na siyang napupusuan among her suitors. "Pero one of them stood out at nandito rin siya sa party," pagmamalaki nito.

Ngunit tumanggi si Inah na i-reveal ang identity ni stand-out suitor, "Hindi ko siya ituturo kasi hindi naman siya showbiz na tao."

FIRST TO KNOW. Ilang buwan nga matapos ang nasabing debut party ay lumabas ang balitang pagpapaksal ni Inah this coming May 28 sa Manila Cathedral.

Kagabi bago tuluyang tumuloy si Lani at ang mister nito na si Sen. Bong Revilla sa magarbong function room ay tinipon muna nila ang press sa isang silid para ilahad ang kanilang saloobin.

Taliwas sa mga naunang pahayag ay diretsong inamin ng mag-asawa ang tunay na kalagayan ni Inah na siyang nagtulak sa pagpapakasal nito sa boyfriend na si Vince del Rosario.

"Siguro this is the most appropriate time kasi all the members of the family are here," bungad ni Lani sa mga reporters habang katabi si Bong.

"We're a public property and we understand that. And we owe it to the public kung ano man 'yong nangyayari sa pamilya namin, the public should know the truth, wala kaming dapat itago," paliwanag ni Bong bago tuluyang pakawalan ang pinakamabigat na rebelasyon: "Aaminin namin, our daughter is pregnant."

According to Lani ay nasa ikatlong buwan, "going on her fourth month," na ngayon si Inah at inaasahang manganganak ito bandang September o October.

Si Lani ang unang nakaalam tungkol sa kalagayan ng pangatlong anak.

"She opted not to tell us yet until we were in the States having a vacation," recollects Lani.