FILM DIRECTING. Sa nasabing dula ay nakipagtagisan sa husay si Ina sa kanyang ina na si Laurice Guillen. Sa local showbiz ay kilala rin si Laurice bilang isang mahusay na direktor sa pelikula at dramang pantelebisyon.

Bilang aktres ay masasabing may pinagmanahan si Ina, na ngayon ay tinutungo rin ang career path ng kanyang premyadong ina.

"Nag-aaral ako ng filmmaking, sa school ni Direk Marilou [Diaz-Abaya], sa Antipolo. Two year-course, na intensive... Sobra akong enjoy!"

At the time of this interview, nasabi ni Ina na she's about to direct a short film, bilang final project niya sa nasabing kurso. It's a 20-minute short film titled Labing-Labing, and who would star in it but her mom and dad (Johnny Delgado).

Balak ni Ina na i-present for a possible Cinemalaya '09 screening ang kanyang short film, na ang kuwento ay tungkol sa mag-asawang nasa punto ng isang pagsubok sa kanilang pagsasama; ito'y nang madiskubre ng husband ang isang di pa kumpirmadong karamdaman.

"Ang simula ng pelikula, masasalat ni Daddy na meron siyang parang bukol sa ano niya!" natatawang banggit ni Ina. "Parang gano'n. So, medyo comedy, humorous. Pero ang tina-tackle, yun nga, cancer."

At kung paano nagku-cope ang mag-asawa sa mga pagsubok na nararanasan.

"Very true-to-life," sambit ng young actress, na buo ang pamilyang kinagisnan. "Naglagay ako ng parang fictitious na anak, na hindi makikita sa buong film."

Sa kanyang enthusiasm na matuto ng mahusay na pagdidirek ng pelikula, hindi nga malayong mag-achieve din si Ina, tulad ni Direk Laurice. Mas mabuti raw na ngayon na siya magsimula.

"Feeling ko, dapat magsimula ako nang maaga. Kasi mataas ang respeto ko sa mga direktor, so kailangan kong ma-earn yung experience," sabi ni Ina bilang pangwakas.