Modeling agencies are going mainstream showbiz for the sake of the boys of Survivor Philippines.

Magkasunod ang naging presscon para sa dalawang castaways ng unang season ng Survivor Philippines. Una ay para sa Pinoy Sole Survivor na si JC Tiuseco at sumunod naman ang para kay John Lopez. Ang nagpatawag ng mga presscon ay ang Mercator Agency ni Jonas Gaffud para kay JC at ang Raven Models ni Raoul Ramirez para naman kay John.

Malaking pangalan sa modeling at beauty pageants ang Mercator. Nasa kanila sina JC; ang international male models na sina Akihiro Sato, Hideo Muracka, at Fabio Ide; ang Star Magic boys na sina Victor Basa at Jubail Andres; ang Pinoy supermodel sa Asian circuit na si Rocky Salumbides; ang dating taga-Star Magic na napapanood ngayon sa Ang Babaeng Hinugot sa Aking Tadyang na si Boom Labrusca; ang semi-retired model turned Pinoy Big Brother housemate turned steward na si Bruce Quebral; pati na ang ex-boyfriend ni Marian Rivera na si Ervic Vijandre.

Sa kababaihan, hina-handle din ng Mercator ang huling apat na naging Bb. Pilipinas-Universe: Gionna Cabrera (2005), Lia Andrea Ramos (2006), Theresa Licaros (2007), at Jennifer Barrientos (2008); pati na si Bb. Pilipinas-World 2008 Danielle Castaño.

Maraming artista na rin ang nahawakan ng kumpanya ni Jonas, ngunit ngayon lang siya nagbigay ng isang showbiz presscon at humarap sa entertainment press.

"Para kay JC lang," sabi ni Jonas sa PEP (Philippine Entertainment Portal).

Bukod kasi sa modeling at commercial assignments ni JC, ang Mercator na rin ang magha-handle ng showbiz career ng unang Pinoy Sole Survivor.

Ganitong-ganito rin ang naging sagot ni Raoul sa PEP nang tinanong namin kung bakit going public din ang Raven Models: "Para lang kay John."

Bago pa lang ang Raven Models kumpara sa Mercator, ngunit impressive din ang lineup ng kanilang talents sa pangunguna na rin ni John. Bukod sa kanya, nasa kanila rin ang Bodyshot winner 2002, Fashionista 2003 winner, Mr. Manhunt Philippines 2003, at Best Model of the World Philippines 2003 representative na si Carlo Adorador; ang Circle of 10 2008 winner Ervin David; at ang current toast of ramp and TVC na si Bea Soriano.

Ang Raven na rin ang hahawak ng showbiz career ni John, na lumalabas ngayon sa 21^st season ng Daisy Siete na "Tarzariray," katambal ang top SexBomb girl na si Rochelle Pangilinan.

Tinanong din namin sina Jonas at Raoul kung ito na ang magiging direction ng kanilang agencies—na sila na rin ang magha-handle ng mga models nilang artista o papasok sa pag-aartista.

Depende lang daw ito dahil basically ay pang-commercial at fashion lang ang kontrata nila sa talents nila. Ang iba nga sa kanila kasi, tulad ni Victor Basa, kontratado ito ng Star Magic nang pumasok ito sa pag-aartista, pero mas nauna naman siyang nakontrata ng Mercator bilang model.