May follow-up project na ang young actor na si Alwyn Uytingco sa TV5.

Ngayong magtatapos na sa ere ang weekly afternoon series na BFGF, sasaluhin naman siya ng bagong show na pagbibidahan nina Ms. Susan Roces, Alice Dixson, at Alex Gonzaga—ang Babaeng Hampaslupa. 

Gagampanan ni Alwyn dito ang role bilang kababata at best friend ni Alex hanggang sa magkaroon siya ng pagtingin dito.

Ang sunud-sunod na projects ni Alwyn ay isang maliwanag na indikasyon na aalagaan siya ng TV5.

Pero bago ang paglabas niya sa Kapatid network ay nagsimula at nagtagal bilang talent ng ABS-CBN si Alwyn. Naging masaya ba si Alwyn sa status niya sa Kapamilya noong nandoon pa siya?

"Masaya naman po ako," mabilis na tugon niya. "Pero hindi naman natin maitatanggi na may mga ups and downs. Sabi nga nila, 'weather-weather.'

"Ako naman, hindi ko naman sila masisi. Paano kung hindi naman ako suitable sa character o sa show? Hindi naman nila ako ipipilit talaga."

Nakausap ng PEP (Philippine Entertainment Portal) si Alwyn sa unang presscon ng Babaeng Hampaslupa noong January 24 sa Cravings restaurant, Tomas Morato Ave., Quezon City.

Hindi ba siya nagtaka kung bakit hindi siya binigyan ng chance na i-buildup ng Kapamilya network?

"Hindi ko naman po sila sinisisi. Okey naman po sa akin. Kasi ako, naniniwala naman ako na may kanya-kanya tayong panahon," sabi ni Alwyn.

GAY ROLES. Gumanap na bading si Alwyn sa movie franchise na Ang Tanging Ina Mo at may mga ilang nilabasan din siyang shows sa ABS-CBN, gaya ng Maalaala Mo Kaya, na gay rin ang character niya.

Bukod sa gay roles, isa sa sinasabing dahilan kung bakit hindi siya na-push ng Kapamilya network ay dahil hindi siya mukhang lalake.

Anong masasabi niya rito?

Natawa muna si Alwyn bago sumagot.

Aniya, "Lahat kasi ng mga actor, lalo na dito sa Pilipinas, ay dumadaan sa gano'ng proseso. Ang aim ko talaga ay versatility, na gusto ko talaga na kahit anong character, magagampanan ko.