Masayang nagbibiruan ang sikat na duo na sina Jose Manalo at Wally Bayola nang naabutan ng PEP.ph (Philippine Entertainment Portal) sa Bacoor, Cavite.

May concert ang dalawa sa Alima Elementary School sa Bacoor, Cavite kaugnay sa 44th birthday celebration ni Congresswoman Lani Mercado-Revilla.

Ganado raw ang dalawa sa pag-perform sa mga ganung free concert dahil iyun daw talaga ang crowd nila na sumusubaybay sa kanila sa Eat Bulaga.

Bukod pa riyan, regalo na rin daw nila iyun kay Lani.

Ilag si Jose kapag tungkol sa kaso nila ni Anna Lyn ang pag-usapan. Kapag tungkol sa kaso, nakikiusap itong huwag na siyang tanungin dahil nasa piskalya na ito at wala siyang kasamang abugado nung mga oras na iyun.

Malaki ang pasasalamat niya sa mga Dabarkads niya sa Eat Bulaga dahil nandiyan ang suporta sa kanya, lalo na ang ka-partner niyang si Wally.

“Ang mga Dabarkads lagi naman nandiyan e. Ang suporta hindi nawawala, at nagpapasalamat na rin sa kanila, kasi siyempre sama-sama kami sa show.

“Alam n'yo naman pag nalulungkot ang isa, nararamdaman din naman ng bawat isa. Pero kahit ano pa man, lalo na kami ni Kalbo [tawag kay Wally], kung show, show kami.

"Kung ano mang may dumarating, kailangan, huwag na natin bitbitin sa trabaho, ” pahayag ni Jose.

Hindi naman daw nila gaanong pinag-uusapan ni Wally ang mga problemang hinaharap niya.

“Ang pinag-uusapan lang naman namin, yung kung ano pa ang puwede naming gawin sa show. More on trabaho ang pinag-usapan namin e,” sagot naman ni Wally.

“Alam naman niyang always support ako sa kanya e. Siya ang partner ko e. Basta moral support kahit na anong mangyari.”

PRAYER HELPS. Naniniwala si Jose na lahat naman daw na hinaharap niya sa ngayon ay idadaan na lang sa dasal.

“Kung may mga intriga mang dumarating, binigay ko na sa Kanya lahat iyun.

“Kung ano ang dapat. Kung ano ang ibibigay Niya sa atin, tatanggapin ko na lang. Hindi ka naman Niya bibigyan kung hindi mo makayanan e,” seryosong sagot nito.