Namaalam na sa Celebrity Duets ang Fil-Brit football (American soccer) player na si Phil Younghusband. Hindi pa nga napigilan ni Phil ang maiyak nang sabihan na siya ng isa sa hosts ng show na si Ogie Alcasid na "This is your last night in Celebrity Duets."
Dalawa sila ng designer na si JC Buendia na may pinakamababang bilang ng text votes mula sa mga performances ng contenders last week. Pero si Phil talaga ang minalas na mayroong mas mababang text votes.
Kung nanatili pa si Phil, siguradong matatanggal din naman siya next week base na rin sa pangit na review sa kanya ng judges na sina Director Freddie Santos at music producer and composer na si Danny Tan. Itinuturo ng dalawang judges na dahilan ng pagkadismaya nila sa performance ni Phil ang choice of song nito. Inawit ni Phil with Jolina Magdangal ang kantang "You'll Always Be My Baby" na orihinal ni Mariah Carey at ni-remake ni American Idol winner David Cook.
"Man, that sucked. That was so bad," umpisa ni Direk Freddie tungkol sa pagkanta ni Phil, matapos magkomento sa boa na bigay ni Ogie sa guwapong football player.
"I want you to stay, 'cause you are one of the nicest dudes in the whole thing. And I hope that's what the audience will vote for," bawi naman ni Direk Freddie sa huli.
"Last week I said you are the most improved singer. Now, I'm taking it back," sabi naman ni Danny nang siya na ang magsimulang magbigay ng sentensiya kay Phil. Sabi pa ng award-winning composer and album producer, masyado raw kumplikado ang piniling kanta ni Phil. Dapat daw ay mga simpleng kantang may limang notes lang ang kantahin ni Phil. "Songs that will fit you," dagdag pa ni Danny.
Sina JC, Bayani Fernando, Joey Marquez at ang nag-iisang babaeng si Carlene Aguilar na lang ang mga natitirang contenders sa Celebrity Duets 2.