Magkakaroon ng malaking pagbabago sa lineup ng mga susunod na pelikulang ipalalabas ng Star Cinema after ng latest movie offering nila this Holy Week, ang horror-suspense thriller na T2 (Tenement #2).

Last Monday, March 30, nag-meeting ang managing director ng Star Cinema na si Malou Santos at Viva big boss na si Vic del Rosario bago tumulak ang huli papuntang U.S. para sundan ang talent niyang si Sarah Geronimo, na may concert tour doon.

Pinag-usapan nila ang susunod na proyekto na gagawin ni Sarah sa co-production movie ulit ng Star Cinema at Viva Films after two blockbusters—A Very Special Love and You Changed My Life. This time, si Rayver Cruz na ang leading man ni Sarah at makakasama nila sina Toni Gonzaga at Vhong Navarro.

Uunahin daw ito bago ang third installment ng A Very Special Love at You Changed My Life nina Sarah at John Lloyd Cruz. Ginagawa naman ngayon ni John Lloyd ang first movie niya with the Star for All Seasons Vilma Santos and Luis Manzano.

Nakatakdang lumipad patungong U.S. si John Lloyd next week kasama sina Piolo Pascual, Bea Alonzo, Sam Milby, at Pokwang for a series of shows. Pagkatapos mag-show ni John Lloyd ay didiretso na siya sa New York para sa shoot ng movie nila ni Governor Vi. Kaya mahigit isang buwan mawawala si John Lloyd sa bansa.

Inamin naman ni Ms. Malou na si Gerald Anderson talaga ang una nilang napili to pair with Sarah for this project. Parehong gusto nina Ms. Malou at Boss Vic na makapareha ni Sarah si Gerald. Pero dahil sa dami ng nakuhang reaction from the Gerald-Kim [Chiu] fans, kaya hindi na nila itinuloy. Napagdesisyunan ng Star Cinema na gawan ng solo movie ulit sina Kim and Gerald.

Hindi na rin daw matutuloy ang nauna nilang plano na gawin sa big screen ang Kelly, Kelly (Ang Hit na Musical) na proyekto dapat nina Kim and Gerald with Melissa Ricks, Matt Evans, Rayver Cruz, and Maja Salvador.

Ayon kay Ms. Malou, matatagalan pa bago gawin ang Kim-Gerald movie dahil hanggang June pa ang very successful teleserye nila na Tayong Dalawa.

"Tatapusin muna nila ang Tayong Dalawa, 'saka namin gagawin yung movie. Mahihirapan ang mga artista kapag pinagsabay namin. Kawawa naman ang mga artista. At saka nagsa-suffer din yung ginagawa nila," sabi ng managing director ng Star Cinema.

Next month ay magsisimula na si Direk Cathy Garcia Molina sa first movie niya with Aga Muhlach. First time din sa proyektong ito makakatrabaho ni Aga si Angel Locsin.

Humihiling naman ng meeting si ex-President Joseph Estrada ng meeting kay Ms. Malou para sa pelikulang nais niyang gawin with Ai-Ai delas Alas.

Niluluto rin ngayon ng Star Cinema ang proyekto na pagsasamahan sa unang pagkakataon nina Willie Revillame at Kris Aquino. Si Willie ang itinanghal na Most Powerful entertainer ng YES! magazine for 2008-2009 habang si Kris naman ang pumangalawa.

Nakausap na ni Malou si Willie. Right after ni Willie, si Kris naman ang kinausap ni Star Cinema head. Pinaghahandaan naman ng Star Cinema kung paano aayusin ang schedule ng dalawa since pareho silang may daily shows sa ABS-CBN.