Sa ginanap na 59th FAMAS (Filipino Academy of Movie Arts and Sciences), nanalong Best Picture ang pelikulang pinagbidahan ni Ai-Ai delas Alas, Ang Tanging Ina Mo (Last Na 'To).
Ginanap ang naturang awards night noong Sabado, December 10, 2011, sa Tanghalang Leandro Locsin ng National Commission for Culture and the Arts (NCCA) sa Intramuros.
Sa unang pagkakataon, si Ai-Ai din ang nag-uwi ng tropeyong FAMAS bilang Best Actress.
"Ah, mabigat nga! Parang isang drum [ang timbang]," kuwelang panimula ni Ai-Ai habang hawak-hawak ang napanalunang trophy.
"Nakakatuwa po, kasi, sabi nga nila, noong bata pa ako, 'pag kunwari umaarte-arte ka, 'Wow, pang-FAMAS!' Yun lang po kasi ang alam natin na award!
"Sabi ko sa sarili ko, kumpleto na yung career ko, dahil nakatanggap na ako ng FAMAS award... kasi, ito na lang ang kulang na award sa akin, e. Ay, meron pa pala, Oscar's!" biro pa ng komedyana.
Mula rin sa Star Cinema, si John Lloyd Cruz, ang isa sa bida ng Miss You Like Crazy, ang napiling Best Actor.
Hindi makapaniwala si John Lloyd na siya ang best actor ng taon sa FAMAS.
"Wala hong exaggeration, talagang nakakagulat ho," sabi ni Lloydie sa kanyang acceptance speech.
"Halos hindi ako makapaniwala na kasali ako, o isa ako sa mga pararangalan ngayong gabi.
"Pero ako'y nagpapasalamat nang taos-puso... at alam n'yo, sa lahat ng co-nominees ko... sa totoo lang ho, talagang imposible ho ito! Imposible ho ito! Ang hirap paniwalaan, pero maraming maraming salamat po. Sa FAMAS, nagpapasalamat ako...."
Kapwa binanggit nina Ai-Ai sa kanilang pasasalamat, among others, ang mga bosses nila sa ABS-CBN at Star Cinema, si Charo Santos-Concio at Malou Santos.
In-acknowledge din ni Ai-Ai sina Direk Wenn Deramas, ang manager niyang si Boy Abunda at kaibigang Lito Alejandria (kasosyo ni Ai-Ai sa negosyo).
Kinilala naman ni John Lloyd ang tulong ni Cathy Garcia-Molina, ang director ng Miss You Like Crazy, at mga kasama sa pinagwagiang pelikula, at pinuno ng Star Magic na si Johnny Manahan.
May pahabol din si Ai-Ai, sa kanyang acceptance speech. "'Wag n'yo hong kalimutang panoorin, Enteng ng Ina Mo, sa Metro Manila Film Fest!"
VINDICATION. Ang napiling Best Director ng FAMAS ay si Albert Martinez para sa Rosario ng Studio 5 (Cinemabuhay).
Para sa actor-director, ang pagkapanalo niya ngayon sa FAMAS 2011 ay isang vindication. Matatandaan na ang period film na ito (starring Jennylyn Mercado) ay hindi napiling isa sa tatlong best pictures sa 2010 Metro Manila Film Festival. Natalo rin si Albert sa Best Director category ng MMFF nang manalo si Wenn Deramas para sa Ang Tanging Ina.
"Yeah... save the best for last!" masayang wika ni Albert.
"I'm thankful it [Rosario] was recognized [by FAMAS]," sabi ni Albert nang ma-interview ng PEP.ph (Philippine Entertainment Portal) immediately after the awarding ceremonies.
