Inirelease ni Jessa Zaragoza ang kanyang pinakabagong album na may titulong Pag Wala na Ang Ulan under GMA Records.

Sa July 17 press launch ng nasabing album sa Old Spaghetti House sa Timog, Quezon City, ibinahagi ng Phenomenal Diva at Jukebox Queen ang mga detalye tungkol sa kanyang latest record.

Naglalaman ito ng limang orihinal na kanta: “Ayoko Na,” “Napatawad Na Kita,” “Buti Na Lang,” “Nasaan,” at ang pinaghanguan ng title ng album, “Pag Wala Na Ang Ulan.”

Bukod sa original songs ay mayroon ding minus-one version ang bawat kanta bilang tugon sa request ng mga fans.

Ayon kay Jessa, “Lahat ng songs dito sa album merong minus one kasi nirerequest talaga sa ’kin yun nung mga supporters ko, mga fans ko na gusto nila merong minus one.”

Bago pa man daw ilaunch ang album sa Party Pilipinas noong Linggo ay naging number one na sa ilang mga radio stations ang carrier single niyang “Pag Wala Na Ang Ulan,” na isinulat ni Jimmy Antiporda.

Inilabas na rin daw sa YouTube ang music video nito na nilikha ni Raymund Isaac.

Ang kantang “Nasaan” na komposisyon ni Vehnee Saturno ay naging theme song din ng GMA-7 teleserye na Kung Aagawin Mo Ang Langit.

Ka-duet naman ni Jessa si Kris Lawrence sa awiting “Napatawad Na Kita,” na komposisyon din ni Jimmy Antiporda.

Samantala, ang asawa mismo ni Jessa na si Dingdong Avanzado ang nagsulat ng kantang “Ayoko Na.”

Itinanggi naman ni Jessa na may kinalaman sa kanyang pinagdadaanan sa buhay ngayon ang nasabing kanta.

“Alam mo, ang story nung Ayoko Na, ako nagbigay sa kanya ng title saka ng...kumbaga theme ng kanta.

“Sabi ko sa kanya [Dingdong], hon, pwede bang igawa mo ko ng kanta na parang ang sinasabi nung lyrics, eh, ‘ayoko na talaga…ayoko na…kahit anong gawin mo, kahit mahal pa kita, ayoko na talaga' parang ganun,” paliwanag ni Jessa.

Nang papiliin si Jessa ng kanta na talagang nakakarelate siya, sagot ng singer: “Etong cut 5, ‘Buti Na Lang.’

“Pag narinig mo yung ‘Buti Na Lang,’ buti na lang, ikaw ang pinili ko…na buti na lang na ikaw ang nagpapasaya sa buhay ko. Parang something like that.”

Ano naman ang inspirasyon niya sa bagong album na ito?