UPDATE: Ayon sa ulat ng PEP Alerts ngayong gabi, December 9, si Bowie Lam ng Hong Kong ang nanalo sa Best Drama Actor category ng 15th Asian TV Awards. Kinilala si Lam para sa kanyang performance sa Sister of Pearl.

Isa sa mga tinalo ni Lam sa naturang kategorya ang Filipino actor na si Dingdong Dantes. Na-nominate ang Kapuso actor para sa pagganap niya sa Stairway To Heaven.

Dumalo si Dingdong sa awards night ng Asian TV Awards na ginanap sa Pan Pacific Hotel ng Singapore.

Naging presenter ang aktor para sa mga awards na Best Lifestyle Programme, Best Talk Show, at Best Single Drama/Telemovie Programme.


Bukod kay Dingdong, dumalo rin sa awards night sina Jiggy Manicad at Richard Gutierrez, na siyang representative ng Planet Philippines, ang Kapuso show niya na nominated para sa Best Natural History or Wildlife Program or Docu-Drama.

Si Rufa Mae Quinto naman ang nag-represent sa Bubble Gang, na nominated sa Best Comedy program category.

Narito ang orihinal na artikulo:


Sa December 9 gaganapin ang awards night ng 15^th Asian Television Awards (ATA) sa Pan Pacific Hotel sa Singapore.

Dadalo rito si Dingdong Dantes, na isa sa mga nominado sa kategoryang Best Drama Actor para sa kanyang pagganap sa GMA-7 primetime series na Stairway to Heaven.

Ang isa pang Pinoy na nominado ay si Michael V, bilang Best Comedy Actor para sa Pepito Manaloto ng GMA-7. Samantala, apat pang programa ng Kapuso network ang nominado sa iba't ibang kategorya.

Kung walang magiging aberya, bukas ng umaga ang lipad ni Dingdong at ng kanyang manager na si Perry Lansigan papuntang Singapore.

Ayon kay Dingdong, ang kanyang pagdalo sa awards night ng ATA ay bilang respeto sa pagkilalang ginawa sa kanya.

"Win or lose, may respeto ako at nire-recognize ko yung nominasyon na ginawa nila sa akin. And it's also a privilege na maimbitahan sa mga rare occasion like that.

"Parang I want to take pride in this opportunity dahil minsan ko lang din i-represent ang ating bansa.

"Manalo-matalo, proud ako sa nagawa ko. Mas malaking bonus lang talaga na manalo," saad niya nang makausap ng PEP (Philippine Entertainment Portal) sa Christmas party ng PPL Entertainment para sa press last week.

VALIDATION AS AN ACTOR. Ito ang ikalawang pagkilala na natanggap ni Dingdong para sa pagganap niya sa Stairway to Heaven. Last month ay itinanghal din siyang Best Drama Actor sa Star Awards for TV.

"At least, parang papaano, na-validate yung hard work," sabi ni Dingdong.