Unang sabak pa lang sa projects na ipinagkatiwala kay JM de Guzman, from Kristine Series hanggang sa Mula sa Puso where he plays the role of Gabriel, kinakitaan na ng husay at lalim sa pag-arte ang young actor.

It was 13 years ago nang unang sumubok na makilala sa mundo ng showbiz si JM, pero kailan lang nabigyan ng magagandang breaks.

Kung magtutuluy-tuloy ang magagandang mga proyekto na ginagawa ni JM, hinuhulaang isa siya sa kikilalaning mahusay na aktor sa kanyang henerasyon.

Sa interview ng PEP.ph (Philippine Entertainment Portal) kay JM noong taping ng Mula Sa Puso para sa finale week ng nasabing serye, tinanong namin ang young actor kung ano ang susunod niyang project.

"Sa ngayon, wala pa akong naririnig na next project ko. Pero [iba] ang paniniwala ko naman sa buhay.

"Ayokong mag-expect. Ang gusto ko lagi ay mag-hope for the best.

"Sa susunod kong projects, kung [anong] genre at kung sinuman [ang makakasama ko], sana sa genre na di ko pa nasusubukan. 

"Siguro yung pagiging kontrabida sa soap, open ako dun bilang aktor.  Gusto ko lahat masubukan ko. 

"Sa leading lady naman, kahit sino na hindi ko pa nakakatrabaho.

"Kasi, kahit sinong tao, may iba't iba kang matututunan sa kanila."

Ano ang feeling niya na isang linggo na lang ang Mula sa Puso at magpapaalam na ito sa ere?

"Malungkot na masaya. Kasi para na rin kaming pamilya sa set. Masaya kasi ito 'yung first [big] break na ibinigay sa akin.

"Mami-miss ko 'yung araw-araw kaming magkakasama sa show. Kasi, from the director, cast, isang pamilya ang turingan namin dito. 

"Saka marami akong natutunan dito. Unang-una na yung professionalism at disiplina. At laging relaxed lang sa lahat. 

"Pag hindi mo makuha sa una [ang eksena], makukuha mo din eventually."