Natutuwa ang young actress na si Glaiza de Castro dahil sa kauna-unahang pagkakataon ay nagkaroon na siya ng primetime show sa GMA-7—ang epic adventure na Asian Treasures, na pinagbibidahan nina Robin Padilla at Angel Locsin.
Nang umalis si Glaiza sa bakuran ng Star Magic ng ABS-CBN 2 last year ay lumipat siya sa Kapuso Network. Agad naman siyang isinama sa Fantastikids, kung saan itinambal siya sa StarStruck 3 Ultimate Sole Survivor na si Marky Cielo.
Ngayon at namaalam na sa ere ang Fantastikids, magkasama pa rin sila ni Marky sa Asian Treasures. Obvious na ginu-groom sila ng GMA-7 bilang loveteam, pero sabi ni Glaiza ay hindi pa sila masyadong close ni Marky.
"I'm still getting to know Marky. Noong ginagawa namin ang Fantastikids, okay naman kami. Pero hindi kami masyadong nakakapagkuwentuhan kasi madalas si Ryza [Cenon] ang kakuwentuhan ko. Now, sana maging mas close pa kami ni Marky kasi magkatrabaho na naman kami ngayon sa bagong show," nakangiting sabi ni Glaiza.
Isa pang dahilan kung bakit masayang-masaya si Glaiza sa pagkakasali niya sa Asian Treasures ay dahil kasama niya rito ang sinasabing "long-lost sister" niyang si Angel Locsin.
Ilang beses na raw kasi siyang napagkakamalang si Angel kahit noong nasa Kapamilya Network pa siya. Minsan daw ay tinatawag siyang Darna, Alwina, at Sabina ng mga fans, samantalang ang lahat ng nabanggit ay mga karakter na pinasikat ni Angel sa telebisyon.
"Minsan nga nakakahiya na kay Angel dahil napagkakamalan na ako siya. Ikumpara ba naman ako kay Angel, wow!" pahayag ni Glaiza.
"Pero mabait kasi si Angel kaya noong magkasama na kami rito sa Asian Treasures, laki ng tuwa ko. Wala pa naman kaming mga eksenang magkasama, pero siguro soon magkakaroon kami," dagdag niya.
Ginagampanan ni Glaiza ang papel ng kapatid ni Robin sa Asian Treasures na magsisimula sa January 15.