Nabalitaan ng PEP (Philippine Entertainment Portal) na nakunan na ang cameo scene ni Ryan Agoncillo sa horror film na Ouija noong Saturday, March 31. Sa Subic ang shooting dahil pilot ang role ng TV host-actor at di na flight attendant na unang planong gagampanan sa Judy Ann Santos-Jolina Magdangal movie.
Walang talent fee si Ryan sa guesting niya sa GMA Films movie. Pambawi niya ito sa paggi-guest ng girlfriend na si Judy Ann sa first movie lead niyang Umaaraw, Umuulan kung saan hindi rin nagpabayad ang young superstar.
Samantala, nabulilyaso ang sana'y balik-GMA-7 ni Ryan via Showbiz Central dahil hindi siya pumuwede sa offer ng Kapuso Network. Bukod sa tinatapos nila ni Judy Ann ang Ysabella sa ABS-CBN, magiging busy rin siya sa shooting ng My Kuya's Wedding nila ni Maja Salvador for Regal Entertainment na after Holy Week na ang simula ng shooting.
Isusunod niya ang pelikula nila ni Judy Ann sa Regal Entertainment din at kasalukuyan na silang namimili ng right material pati direktor na hahawak sa project. Involved ang magkasintahan sa gagawing pelikula dahil sumasama sila sa meeting ng creative staff at kasamang namimili ng material.