Magiliw na tinanggap ni Yilmaz Bektas ang GMA News at ang PEP (Philippine Entertainment Portal) sa kanyang presidential suite sa isang five-star hotel sa Makati para sa isang one-on-one interview.

First time naming na-meet nang personal si Yilmaz. Palabiro ito at magalang kung magsalita.

Kahit may sariling butler, ipinakita niya ang kanyang hospitality. Siya mismo ang nag-alok at nagsilbi ng inumin at prutas sa amin.

Biniro pa namin na masyado siyang pormal sa kanyang coat and tie. Natatawa siyang tumanggi dahil hindi raw pormal sa kanya ang suot niya. Ipinapakita lang daw niya ang respeto niya sa mga manonood kaya't nag-gayak siya nang ganoon.

RUFFA & KIDS. May isang importanteng proyekto na may kinalaman sa construction ang isa sa ipinunta raw ni Yilmaz dito sa Pilipinas. Pero ang pinakamahalaga raw ay ang makita niya ang kalagayan ng kanyang asawang si Ruffa Gutierrez at ang kanilang dalawang anak na sina Lorin at Venice.

Nag-uusap daw sila ni Ruffa ilang araw bago siya dumating dito, pero hindi raw naniniwala ang asawa na darating siya.

Ikinuwento ni Yilmaz kung paano sila nagkailangan ni Ruffa sa unang beses nilang magkita matapos ang halos anim na buwan. Sa description ng Turkish businessman, para raw silang "total strangers" ni Ruffa. Pero matapos ang kaunting panahon, umayos din ang kanilang usapan. Nagyakap din daw sila at ipinaramdam kung gaano nila na-miss ang isa't isa.

"It was a happy moment for the both of us. When we hugged, I can see it in my kids' eyes how happy they are," kuwento ni Yilmaz.

Ayon pa kay Yilmaz, nag-uusap na sila ni Ruffa tungkol sa mga susunod na hakbang na kanilang gagawin.

Naiintindihan daw ni Yilmaz na may ilang kontrata pa ang kanyang asawa na dapat sundin. Nirerespeto niya raw ang mga ito kaya't magiging alinsunod ang ilan sa kanilang mga plano sa kontrata at schedule ni Ruffa.

Nakikinig daw siya sa mga sinasabi ng asawa at maayos naman ang kanilang mga pag-uusap.

"Of course, if you ask me, I want my family back," sabi ni Yilmaz.

Dagdag pa ni Yilmaz, na masyadong maikli ang oras na gugugulin niya dito para ma-"win back" niya ang asawa.

WILLING TO CHANGE. Nauna nang nagsalita si Ruffa at sinabi nitong "I still love him [Yilmaz] but he has to change."

"I am now talking to three plastic surgeons and I might color my hair blonde," pabirong sagot naman ni Yilmaz.