Bago nagpasya si Aiko Melendez na makipaghiwalay sa kanyang asawang si Martin Jickain, isa sa mga unang tinawagan ng actress-turned-politician ay si Wygard Tracy, ang dating niyang manager at naging ninong sa garden wedding nina Aiko at Martin noong Pebrero 2006.

Alam ni Wyngard ang mga dahilan ng paghihiwalay ng mag-asawa pero hindi siya nagkuwento nang makausap siya ng PEP (Philippine Entertainment Portal) sa taping ng Celebrity Duets noong Sabado, ika-15 ng Setyembre.

“Nagpapasalamat ako dahil may gag order ang korte dahil sa PPO (Permanent Protective Order) na isinampa ni Aiko,” ang bungad ng batikang manager na alaga rin sina Maricel Soriano at Jaya.

Nakasaad sa Republic Act 9262 na ang PPO “is issued for the purpose of preventing further acts of violence against a woman or her child.” Ang naturang order ay may bisang ilayo ang “petitioner and other designated household member” sa “respondent.” May bisa rin itong magbigay ng “permanent custody of a child/children to the petitioner.”

“Sina Martin at Aiko ang tanging nakakaalam ng kanilang mga problema at sila lamang ang puwedeng makalutas,” ang pahayag ng Celebrity Duets contestant.

Sa tingin ni Wyngard, baka hindi na magkabalikan ang mag-asawa at kung mangyari man ito, dapat maging magkaibigan sina Aiko at Martin alang-alang sa kanilang anak na si Marthena na nag-celebrate ng kanyang first birthday nito lamang July 29.

Ang payo ni Wyngard, na siya ring naghatid kay Aiko sa altar, ay huwag magsalita sa media dahil ayaw niyang matulad ito sa ibang mga tao o artista na pinagpiyestahan ng mga reporter at ng buong madla ang personal nilang buhay.

Nang sabihin noon ni Aiko kay Wyngard na gusto na nilang magpakasal ni Martin, nagkaroon ng mga pangamba ang kilalang talent manager dahil marami na siyang nakitang mga kaso ng whirlwind romance na hindi nagtagal.

Nonetheless, wala siyang nagawa dahil sinabi sa kanya ng dalawa na mahal nila ang isa't-isa.