Although exhausted from work, Dennis Trillio granted an early morning interview and explained his previous silence as unwillingness to complicate the recently resolved feud between his son's mother Carlene Aguilar and his rumored girlfriend Cristine Reyes. This did not mean, he said, "na wala akong ginagawa o wala akong pakialam sa mga nangyayari sa kanila.... Kinakausap ko sila pareho. Pinipilit ko silang ayusin pareho."

 

 

Photo: Nelson Canlas


Binasag na ni Dennis Trillo ang kanyang katahimikan tungkol sa mga isyung nag-uugnay sa kanya sa ina ng kanyang anak na si Carlene Aguilar at sa sinasabing karelasyon niya ngayon na si Cristine Reyes.

 

Galing pa si Dennis mula sa shows niya sa Tarlac at Subic nang humarap siya sa media kaninang madaling-araw, November 24. Halatang pag0d na pagod si Dennis dahil madaling-araw na naganap ang interview na ito.

 

Nakiusap ang manager ni Dennis na si Popoy Caritativo na maging direkta na ang mga tanong sa young actor dahil ayaw na nitong madagdagan pa ang stress ng kanyang alaga. Dinaramdam daw kasi ni Dennis ang mga nagaganap nitong mga huling araw.

 

Tahimik ang matinee idol nang umupo para sa interview. Pero bakas sa kanyang mga mata na may bumabagabag sa kanya.

 

Sa aming pagkakakilala kay Dennis, mas gusto niyang sarilinin na lang ang kanyang mga problema hangga't maaari. Pero sa ganitong mga pagkakataon, kailangan na niyang magsalita.

 

SILENCE IS A VIRTUE. Ipinaliwanag ni Dennis na kaya ngayon lang siya nagsasalita tungkol sa isyu, humahanap siya ng paraan para maayos ang lahat. Ayaw kasi niyang makumpromiso ang dalawang babaeng malapit sa kanyang puso.

 

"Ngayon lang dahil siyempre, ayoko kasing masyadong palakihin," panimula ni Dennis. "Ever since naman, ayokong masangkot sa ganitong klaseng mga controversies, intriga, ganoon. Pero yung silence ko na ‘yon, hindi nangangahulugang...hindi ibig sabihin nun wala akong ginagawa o wala akong pakialam sa mga nangyayari sa kanila. Of course, meron akong pakialam dun dahil involved ako dun. Kahit hindi ako involved sa mismong kaso, sangkot pa din ako dun, di ba? Pero hindi ibig sabihin nun wala akong ginagawa. Kinakausap ko sila pareho. Pinipilit ko silang ayusin pareho.

 

"Personal choice ko ‘yon kasi hindi ko na gustong ibalita pa sa TV kung ano'ng personal na nangyayari sa amin, at saka ever since, gusto kong maging private yung personal life ko. Hindi naman ako yung showbiz na tao na gusto kong malaman ng lahat ang pinaggagagawa ko," paliwanag ng matinee idol.

 

THE REAL SCORE. Dati, hanggang maiiwasan ang mga tanong tungkol kina Carlene at Cristine, iiwas si Dennis para mapreserba ang kanyang personal affairs. To set the record straight, nagbigay na ng panig si Dennis tungkol sa mga relationships in question.

 

Ayon kay Dennis, nasa Amerika pa lang daw si Carlene ay nagkakalabuan na silang dalawa. Pero inako ang matinee idol ang kanyang bahagi sa pagiging magulo ng nasabing relasyon.

 

"Matagal nang magulong-magulo na talaga. Siyempre, maraming kumplikasyon na nangyari. Yung relasyon namin. Yung relasyon ng parents. Lahat-lahat na. Nagkapagtung-patong na. So, magulong-magulo."

 

Ang claim ni Carlene nang umuwi siya rito sa Pilipinas ay inaayos daw nila ni Dennis ang relasyon nila. Ano ang masasabi ni Dennis dito?

 

"Inaayos?" balik-tanong niya. "Yung nangyari kasi, isang pagkakamali ko, inaayos namin as parents ‘to dun sa anak ko. Inaayos namin yung relasyon, yung communication. Open lahat ng communication lines, siyempre lahat. Nasa kanya [Carlene] kasi yung custody ng bata. Ayokong magkagalit-galit kami. Siyempre kasi, gusto kong anytime makapunta ako dun para mabisita ko yung bata. Ayokong mag-wage ng war sa kanya.

 

"Yung sinasabi niyang inaayos namin, yung inaayos namin sa estadong ganoon. Siguro ang mali ko lang doon, kasi hindi ko lang nabigyan ng closure kung ano man yung napag-usapan namin. Napag-usapan namin na magiging mabuti kaming parents, pero yung relasyon, yung romantic side ng relationship, yun ang hindi ko nabigyan ng closure," paliwanag ni Dennis.

 

Nagkaroon ba sila ng relasyon ni Cristine?

 

"Nagkaroon kami ng relasyon," pagkumpirma ni Dennis. "Ngayon, medyo naging kumplikado na rin. Marami na rin, marami nang nasangkot. Marami nang involved."

 

At present, ano ang relasyon nila ni Cristine?

 

"Magkaibigan," sagot niya. "Nag-uusap kami. Actually, sa kanya [Cristine] ko nalaman na kanina, nagkaroon sila [ni Carlene] ng appointment para magkaayos sila personally.

 

May balak ba siyang balikan si Cristine?

 

"Sa ngayon, hindi natin masasabi. Kung ano yung in store, kung ano ang nandiyan sa hinaharap. Gusto ko siguro muna maging single. May anak na ako, gusto ko muna maging mabuting ama sa kanya," sabi ni Dennis.

 

SILENCE AFTER THE STORM. Masaya raw si Dennis dahil nagkita at nagkaayos na sina Carlene at Cristine. Bagama't naging mapait ang kanilang dinaanan, sana raw ay maging maayos ang lahat.

 

"Siyempre, masaya ako dahil yun ang matagal ko nang pinagdadasal, na mangyari ‘yon, dahil lalo na ngayong magpa-Pasko na. Wala naman gustong magkaroon ng galit sa isa't isa, di ba? So at least ngayon, maayos na yung sa kanilang dalawa. Masaya ako na nag-cooperate sila na maayos yung isyu sa kanila," pahayag ni Dennis.

 

Pakiusap ni Dennis, sana raw ay respetuhin ng mga tao ang kanyang mga naging desisyon sa buhay. Ang naging mga komento sa kanya nitong huli, hindi man naging maganda ang lahat, nirerespeto rin daw niya.

 

"Actually, hindi na ako nakakapagbasa ng tabloid," banggit niya. "I'm sure maraming nadidismaya, nadi-disappoint dahil mas pinili kong maging tahimik. Pero ngayon nga, in-explain ko kung bakit ako naging tahimik. Ayokong masyadong palakihin ang isyu. Gusto kong ayusin personally.

 

"Kung hindi sila natuwa dun, opinyon nila ‘yon. Merong sumang-ayon na ‘Okay ‘yan, tumahimik ka.' Kasi although involved ako dun sa kanilang dalawa [Carlene and Cristine], pero ang pinag-uusapan dito yung kaso nila [slander case]. As much as possible, ayokong mag-comment tungkol dun. Pero kanya-kanya ‘yan. Kumbaga, kung sa tingin nila mali yung ginawa ko, mali. Pero yung iba, okay sa kanila. Kumbaga, everyone is entitled to their own opinion."

 

Aminado rin si Dennis na kahit papaano ay mayroong damage ang mga pangyayaring ito sa kanyang career. Hindi man daw nakikita sa ratings ng kanyang shows ang nasabing kasiraan, nararamdaman niyang mayroon itong epekto. Nagpapasalamat siya nang lubos sa mga taong patuloy pa ring tumatangkilik sa kanya bilang artista.

 

Nilinaw rin ni Dennis na una at huli na ang interview niyang ito tungkol sa isyu.

 

Mapapanood din ang interview ni Dennis mamaya sa StarTalk, bukas sa Showbiz Central at Ricky Lo Exclusives (QTV11), at sa Lunes sa 24 Oras.