Handa nang magbagong-buhay ang action star na si Royette Padilla matapos siyang tuluyang makalabas sa rehabilitation center noong nakaraang buwan.
Matatandaan na ibinalita sa Showbiz Central noong November 25 ang pagtakas ni Royette sa di pinangalanang rehabilitation center kung saan siya ay naka-confine.
Sa nasabing episode, inihayag din ni Royette sa exclusive interview sa kanya kung bakit niya nagawang tumakas sa rehabilitation center. Aniya, "Tatlong taon na akong nari-rehab, e. Hanggang ngayon, wala pa ring linaw ang paglabas ko."
Naikuwento rin ng aktor ang diumano'y pagmamaltrato sa kanya sa loob ng rehabilitation center.
"Actually doon, ‘pag medyo makulit ka doon, pinabubugbog ka dun sa mga staff dun," kuwento ni Royette. "'Tapos physically 'pag nagkamali kami ng konti, haharap kami sa pader. 'Tapos pag pinaglinis ako ng banyo doon, pinakakamay sa akin, kamayin ko raw."
Sa kabila ng kuwentong ito ni Royette, pinilit namang maging matigas ng kanyang ina na si Eva Cariño para sa ikabubuti ni Royette. Aniya, "Alam ko naman naghihirap siya dahil ‘yon nga, labas-pasok siya sa rehab. Pero hindi ko rin puwedeng pabayaan na nasa labas na ganoon pa rin, alcoholic pa rin siya. Natatakot ako."
Samantala, sa Showbiz Central kahapon, January 6, ipinakita ang kasiyahan ni Royette ngayong nasa labas na siya ng rehabilitation, kasama ang kanyang pamilya.
"Well, siyempre masayang-masaya ako. Unang-una, nakasama ko yung asawa't anak ko nitong Pasko at nakatikim na ng kalayaan. So I'm very happy," paglalarawan ni Royette.
Sa kanyang paglabas, hiling ni Royette na magkasama-sama silang magkakapatid kasama ang kanilang ina.
"Sa mama ko, sa mga kapatid ko, sana magkasama-sama kami. Patawarin n'yo na ako sa nagawa ko," hiling ni Royette. "Ang mama ko naman, through text, I'm happy naman sumasagot siya. Unlike nung pagtakas ko, kalalabas ko, talagang kahit anong gawin ko, ‘Hintayin mo kung kelan kita gustong makausap.'"
Nilinaw rin ng aktor na wala siyang sama ng loob sa kanyang ina. Aniya, "Naiintindihan ko naman siya, e. Siyempre, wala namang gusto ang magulang para sa anak kundi ang mapabuti, di ba?"
Dagdag pa niya, "So far, si Rommel [Padilla, his brother] parang nakikipag... parang spokesman ng pamilya. Siyempre, mga payo na, ‘Hayaan mo, 'tol, parang sugat 'yan, maghihilom din.'"
Sa kanyang panibagong buhay, nais ni Rommel na magbalik-showbiz upang makaipon ng kanyang sariling pera.
"Kailangan ko siguro na magkaroon ng parang permanenteng trabaho," pahayag ni Royette. "Sana ilabas-labas ako ng ni Robin para talagang kahit papaano masasabi ko na galing sa sarili ko ang pera, hindi galing sa tulong ng kapatid ko."