Pumalakpak kay Jay-R Siaboc ang maraming bading sa pag-amin nitong nagkaroon na siya ng gay experience. Hindi na lang nag-elaborate ang singer-actor sa amin nang kapanayamin ng PEP (Philippine Entertainment Portal) sa set ng Palos sa may Sandoval Street, Pasig City.

"Ayoko namang magsinungaling, pero siyempre, yung ibang detalye, hindi yata magandang ikinukuwento ko pa," medyo nadyaheng sabi ng binata sa amin.

Pagtatapat pa niya, "Alam ng maraming tao ang pinagdaanan ko. Kung itatago ko pa ang tungkol doon, lalabas na sinungaling ako, at baka sabihin nilang yung ibang nalalaman ng publiko sa akin ay puro kasinungalingan. Tanggapin na lang sana nila kung ano talaga ako."

Sinabi nga ni Jay-R sa amin na dati siyang tambay sa Cebu City bago pa siya sumali sa Pinoy Dream Academy. Ang bahaging ito ng kanyang buhay ay nalantad na't walang dahilan para ikubli pa niya.

"Nanggaling nga ako sa banda, na masuwerte nang tumugtog ng tatlong beses sa isang linggo. Pero most of the time, wala talaga. Nakatulong din naman yun kahit paano. Roon ko nagawang makakanta, at sumali nga sa Pinoy Dream Academy.

"Kaya itong pagpasok ko sa showbiz, malaking adjustment ang ginawa ko. Kaya kung magsisinungaling ako na marami ang nakakaalam sa sinasabi ko, baka kainisan pa ako. Ayoko namang may magalit sa akin," sambit ni Jay-R.

"Hindi na bago ang ganyang balita tungkol sa akin. Kailangan ko pa bang magpaliwanag? Alam ko namang hindi totoo, at iniintriga na lang nila ako," tanging nasabi ni Jay-R.

Kapansin-pansin na mas nalilinya na sa acting career ang nakilalang singer.

"Mas nagugustuhan ko na rin ang acting," sabi pa niya. "Naglabas na kami ng album ko, pero hindi masyadong nai-promote 'yun. 'Tapos, nabigyan ako ng chance para umarte. Dumaming bigla ang projects ko."

Aware si Jay-R sa palagay ng marami na mas mahusay siyang aktor kaysa singer.

"Marami nga ang nagsasabi, marami ang nagsusulat," aniya. "Natutuwa ako siyempre at nagpapasalamat. Pero, gusto ko pa ring kumanta dahil dito ako unang nakilala.

"Hindi ko na maaalis sa sistema ko ang pagkanta. Pero, sa akting kasi, marami akong paghuhugutan ng emosyon. Sa Pinoy Dream Academy na nga lang, sa workshops pa lang, marami ang nagsabi sa akin na may ibubuga nga raw ako sa akting.

"I must admit, nagagamit ko ang mga napagdaanan ko para mapahusay rin yung akting ko," banggit na lang ni Jay-R.

Paano kung paganapin siya ng sexy role?

"Ah, yung maghuhubad?" inosenteng balik-tanong niya sa amin. "Parang nakakahiya naman. Kasi, wala akong ipakikita. Pero, kung kailangan talaga, siguro, paghahandaan ko. Gaya rito sa Palos, nag-a-action ako rito, nag-aral kami ng martial arts at wushu bago kami sumabak dito.