Sa presscon ng pelikulang Torotot ng Viva Films, humarap sa press people ang mag-inang Maui Taylor at Mommy Antonette.

Nagbigay ng pahayag si Mommy Antonette ukol sa mga alahas na hindi na naibalik ng ina ni Angelica Jones na si Mrs. Beth Jones. Nagkakahalaga ang mga alahas ng P400 thousand at ipinagkatiwala niya sa ina ni Angelica nung isang taon pa.

"Dahil kakilala ko sa showbiz at laging nakakasama sa mga shows, nagtiwala ako sa kanya, hindi ko inisip kailanman na sa ganito mauuwi yung tiwalang yun," paglalahad ni Mommy Antonette.

Sa kanyang kuwento, lumapit daw ang isang kaibigan niya sa kanya upang magpabenta ng mga alahas. Si Mrs. Beth Jones daw ang pinagkatiwalaan niya pero hanggang sa ngayon, wala pa raw naibibigay na kabayaran o kahit man lang yung mga alahas na kinuha.

"Siyempre, ako ang kinukulit ng taong kausap ko, ako kasi ang nagbigay sa kanya ng mga alahas. Pero una pa lang, sinabi ko nang wala akong hilig sa alahas. Kami ni Maui, walang hilig talaga sa mga alahas, pero dahil gusto kong matulungan yung tao, sa nanay ni Angelica ko ibinigay yung mga alahas upang ipabenta.

"Lagi na lang siyang nangangako, hindi naman siya tumutupad. Wala na akong mukhang ihaharap sa mga tao."

PIMPING MAUI. Nagpahayag pa si Mommy Antonette sa mga sinasabi umano ni Mrs. Jones na ibinubugaw raw ni Mommy Antonette si Maui.

"Hindi lang ako kumikibo, kaming dalawa lang ang nakaaalam ng lahat. Pero sa bandang huli, ako pa'ng siniraan niya. Kesyo ako raw, binubugaw ko sa Maui. Ano ba yun, sarili kong anak, ibinubugaw ko? Parang hindi naman yata totoo yung bintang niya.

"Kung baligtarin kaya namin ang situwasyon. Siya ang sabihan kong ibinubugaw niya ang anak niya, ano kaya'ng maramdaman niya? Hindi kaya siya magalit sa akin?" halos maiyak pa sa galit na sabi ng nanay ni Maui Taylor.

Sinabi rin ni Mommy Antonette na natunton niya ang mga nawawalang alahas sa isang pawnshop. Meron daw nagbigay sa kanya ng kopya ng mga papel de ahensiya at isinangla raw pala ang mga alahas na pinabebenta niya.

"Yun talaga ang mga alahas na ibinigay ko sa kanya. Pinuntahan namin sa pawnshop at pinatotohanan nila sa akin yun. Yun talaga ang mga iyon," kuwento pa nito.

Ngayon nga ay lalong umigting ang galit ni Mommy Antonette. Nalayo na raw kasi ang isyu ng away nila sa mga hinahanap niyang mga alahas. Pero siya na raw ang siyang tinitira ni Mrs. Jones. Kaya dahil dito, nakahanda na raw siyang labanan ito.

"Kahit ano pa'ng gusto niya, kahit saan, hindi ko na siya uurungan, bayaran niya ako kung gusto niyang matapos na ang lahat nang ito," may halong banta pang sabi ng mommy ni Maui Taylor.

MRS. JONES'S REACTION. Bago namin isinulat ang artikulong ito, sinikap ng PEP (Philippine Entertainment Portal) na kunin ang reaksyon ni Mrs. Jones, through text. Sumagot naman sa text namin si Mrs. Jones at ito ang kanyang pahayag:

"Ayoko nang sumagot tungkol diyan, basta ang alam ko, mahal kami ng Diyos, kahit na may mga umaaping tao sa amin, hindi niya kami pinababayaan, ayoko nang sumagot tungkol diyan.