Ipinagtanggol ng StarStruck 4 Avenger na si Stef Prescott ang rumored suitor niyang si Rainier Castillo. Marami kasing fans ang nagpaparating ng mensahe kay Stef na galit daw sila kay Rainier dahil sa patuloy na pagde-deny nito na nililigawan niya ang young actress.
Ayon kay Stef, totoo naman ang mga sinasabi ni Rainier. Hindi naman daw nanliligaw sa kanya ang StarStruck 1 First Prince at talagang magkaibigan lang sila.
"Huwag naman sana silang magalit kay Rainier kasi tama naman ang mga sinasabi niya. He is not courting me and we're only friends. Yun lang ‘yon," panimula ni Stef sa panayam sa kanya ng PEP (Philippine Entertainment Portal).
Patuloy niya, "Before kasi noong nag-i-start pa lang ako sa StarStruck, isa sa Rainier sa mga unang nakilala ko. Naging constant ang communication namin, pero never naman niyang sinabi na manliligaw siya sa akin. Hindi ko lang alam kung baka natorpe siya or nahiya siya, pero he never asked me kung okay lang siyang manligaw. Kaya ang masasabi ko lang sa aming dalawa ay friends kami. Yun lang."
Pero marami na kasing nakakita na nagde-date daw sila ni Rainier.
"It's true na sometimes lumalabas kami, pero laging kasama ang mommy ko," paglilinaw ni Stef. "Never naman akong sumama kay Rainier na mag-isa lang ako. Alam naman ni Rainier na I can't go anywhere without my mom beside me."
Ano naman ang totoo sa insidente na nakita siya diumanong kausap ang ex-girlfriend ni Rainier na si Sheena Halili? Umiiyak pa raw siya noong kausap nito si Sheena.
"That is something between me and Sheena na lang," iwas ni Stef. "Hindi ko naman ide-deny ‘yan because may mga nakakita naman sa amin talaga. Pero kung ano yung itinakbo ng conversation namin, sa amin na lang ‘yon sana."
Hindi lang daw si Rainier ang naging close kay Stef kundi pati na rin si Marco Alcaraz. Naging malapit daw ang isa't isa nang magkasama sila sa afternoon drama ng GMA-7 na My Only Love. Nagpaliwanag si Stef tungkol dito.
"Mabait si Marco, pero I told him nga na maging friends na lang kami. Ang concentration ko talaga ay sa trabaho. I'm still young at ang pagkakaroon ng boyfriend ay wala sa priorities ko ngayon," pahayag ni Stef, na kasama sa soap opera na Babangon Ako't Dudurugin Kita.