"She's a natural actress," ang halos magkaparehong description nina GMA Films president Annette Gozon-Abrogar at si Roselle Monteverde-Teo ng Regal Entertainment sa first shooting day ni Annabelle Rama para sa pelikulang My Monster Mom.
Naimbitahan ang PEP (Philippine Entertainment Portal) sa shooting ng My Monster Mom kagabi, Abril 8, sa isang lugar sa Quezon City. Nagkaroon kami ng pagkakataon na makapanayam ang mag-inang Annabelle at Ruffa Gutierrez, pati na ang direktor nilang si Joey Javier Reyes.
Sinabi ni Direk Joey sa PEP na walang tensiyon o problema sa unang araw ng pagsipot sa shooting ni Annabelle. Aliw na aliw nga raw siya sa pagiging natural ng ina ni Ruffa.
"Karakter talaga si Tita. Isipin naman ninyong sa rehearsal pa lang ay ibinibigay na niya ang lahat. Kaya ‘pag sinabi kong final take na, doon pa lang siya natataranta dahil ang akala pala niya, yun na yung rehearsal. Kuwela tuloy ang ending. But for sure, we will have great time for this one. Masaya ang set," kuwento ni Direk Joey.
Para kay Ruffa, ikinukunsidera niyang first movie ito ng ina.
"I know nothing about her previous movies. For sure, forgettable lahat yun. I'm simply proud of my mom kasi at her age. Look naman, she's so busy at nakakakuha pa siya ng mga ganitong projects. Basta ang sabi ko sa kanya, since ako naman talaga ang mas artista sa amin, dapat lang sigurong ako ang mauna sa billing!" ang natatawang sabi ni Ruffa.
Ikinuwento rin ni Ruffa na sa bahay pa lang nila ay panay na ang practice ng mommy niya ng mga dialogue niya sa pelikula para pagdating niya sa set ay kabisado na niya ang kanyang mga linya.
Nasaksihan ng PEP ang klase ng pag-iistima ni Annabelle sa mga katrabaho. Nagpadala pa siya ng lechon Cebu at ibinahagi niya ito sa mga kasama sa set.
"Ganyan talaga si Mommy," sabi ni Ruffa. "Kaya nga I could never imagine kung paano siya magtatagal sa set. You know, yung hintayan, yung matagal na set-up, etcetera."
Naitanong tuloy ng PEP kay Annabelle kung paano niya aasikasuhin ang ibang mga alaga niya at ang mga commitments nila ngayong nagsu-shooting na rin siya.
"Baka ho dito na ninyo sa set kausapin o gawin ang mga deals ninyo?" biro namin sa kanya.
"Why not? Hindi imposible ‘yan," sabi naman ni Annabelle.
Bukod sa kanilang mag-ina, kasama rin sa My Monster Mom ang alaga ni Annabelle na si JC de Vera na gaganap bilang anak din niya, pati na si Mart Escudero. Si Rhian Ramos ang gaganap na batang Annabelle, habang may special participation si Richard Gutierrez bilang batang Eddie Gutierrez.
Hindi man ito true-to-life movie, pero sa sobrang lapit daw ng mga pangyayari at mga situwasyon, "totoong-totoo ito sa buhay ko," hirit ni Annabelle.