Angel Locsin celebrated her 23rd birthday last April 23 sa pamamagitan ng gift-giving sa mga bata sa Payatas. Bukod dito, ang ilang oras na kasama niya ang entertainment press ay itinuturing din ni Angel na celebration ng kanyang kaarawan. Binigyan kasi siya ng ABS-CBN ng solo presscon kahapon, April 27, para sa kanyang birthday at para na rin sa Lobo.
Ang ikatlo naman daw niyang celebration ay ang party or fans day niya with her international fans club, na ang mga miyembro ay galing pa raw sa iba't ibang bansa. Umuwi lang daw ang mga ito just in time for Angel's birthday.
DOUBLE CELEBRATION. Pagdating naman sa naging selebrasyon nila ng rumored boyfriend na si Luis Manzano, tipid ang mga sagot ni Angel nang tanungin tungkol dito. Aniya, ibang presscon daw 'yon dapat dahil para sa Lobo ang ginaganap na presscon.
Gayunpaman, hindi nagdamot si Angel na sabihing flowers ang gift sa kanya ni Luis on her birthday. At dahil nag-celebrate din si Luis ng kanyang 27th birthday last April 21, binigyan siya ni Angel ng upuan na magagamit ng binata sa pagte-taping or shooting nito.
"Napakababaw namin, ‘no? Wala siyang ganun [chair], e, serious... ‘Kakaawa siya, ‘no?" natatawang sabi ni Angel. "Siyempre sa trabaho namin, kailangan kahit paano kumportable kami. Gagawa na kami ng paraan para maging kumportable kami.
"At sa tingin ko naman, hindi naman kailangang mamahaling regalo, di ba? Wala naman yun sa presyo or sa mahal kundi yung naisip mo," pahabol ng dalaga.
Dahil nasa ibang bansa ang ina ni Luis na si Ms. Vilma Santos, nagpasabi lang daw ito ng pagbati sa kanya. Pero ayaw nang i-elaborate pa ni Angel kung ano ang naging message sa kanya ng Star for All Seasons at Batangas governor dahil up to now, nahihiya at nai-starstruck pa rin daw siya rito.
Bagama't madalas silang makitang magkasama at nagpapalagay na sila na talaga, hindi pa rin umaamin sina Angel at Luis sa totoong estado ng relasyon nila.
"Sa akin kasi, may mga bagay na hindi mo naman kailangang sabihin pa," paliwanag ni Angel. "We're close. Masaya kami kapag magkasama kami. Mabait na tao si Luis, sobra. Alam n'yo naman yun, kapag nakasama mo na, napakabait na tao ni Luis. Yun lang ang masasabi ko at hindi ko na naman kailangang isa-isahin pa."
Paano niya ide-describe ang lovelife niya ngayon?
"Isa siyang life! Kung dati wala akong life, ngayon meron na!" natatawa niyang sabi.
MOVIE WITH STAR CINEMA. Sa birthday presscon ni Angel na rin in-announce na hanggang July pa mapapanood ang teleserye nila ni Piolo Pascual na Lobo. Bukod dito, magkakaroon na rin ng pelikula si Angel sa Star Cinema kung saan makakatambal niya ulit si Piolo.
Wala pa raw title ang movie na gagawin nila.
"Kaka-present pa lang po sa amin. Nakaka-challenge po yung movie. Yung location po, hindi po sa Manila gagawin. Probinsiyang-probinsiya po siya at pagkatapos nga po, sa ibang bansa na po kukuhanan yung ibang scenes. Ang alam ko lang po, dapat ko pong ayusin ang acting ko dahil medyo mabigat po, acting pong talaga," pahayag ni Angel.
Excited na raw siyang simulan ang gagawing movie sa Star Cinema.
"Excited ako kasi matagal-tagal na rin akong hindi nakakagawa ng pelikula. Siguro isang taon na rin akong hindi nakikita sa big screen. At yung makasama ko si Piolo Pascual sa pelikula, ibang kasiyahan yun para sa akin. At saka siyempre, yung makagawa ako ng project sa Star Cinema... yung mga tumutulong po sa akin, like si Tita Malou Santos, excited po talaga ko," pahayag ni Angel.
Nabanggit din ng young actress na isa sa pangarap na gusto niyang ma-achieve ay ang manalo ng acting award.
Nang lumipat si Angel sa ABS-CBN from GMA-7, lumabas din ang isang isyu tungkol naman sa kontrata niya sa Regal Entertainment. Ito raw ang dahilan kung kaya't hindi siya makakagawa ng any film outside Regal.
Wala na bang problema sa paggawa niya ng movie sa Star Cinema ngayon?
"Actually, sa kontrata ko po, wala naman pong problema talaga," sagot ni Angel. "Nag-usap naman po ang Star Cinema at saka sina Mother Lily po... Actually, hindi ko po alam kung ano ang napag-uusapan po talaga. Pero ang kontrata ko po, malinis po. At may kontrata rin po ako sa Star Cinema."
Pero inamin ni Angel na hindi pa sila nagkakausap o nagkikita ni Mother Lily hanggang ngayon.
"Si Mother, mahal na mahal ko. Sa kanya ho ako nagsimula. Maayos naman po ang pag-uusap. Kami po ni Mother, hindi pa po nagkikita... Siyempre, inaayos pa po nila. Siyempre, napagsabihan din ako na sila muna ang mag-uusap bago ako.
"Pero ako po, tanggalin na natin ang kontrata. Pero sa lahat ng naitulong sa akin ni Mother at sa lahat ng kabutihang ipinakita niya sa akin, kahit walang bayad, kahit walang kontrata, willing akong gumawa ng pelikula sa kanya."
ANGEL AS KAPAMILYA. Naitanong din kay Angel ang mga pagbabago sa kanya ngayong mag-iisang taon na rin simula nang mapagdesisyunan niyang lisanin ang kanyang dating home network na GMA-7.
"Alam n'yo po, magiging honest po ako," simula niya. "Ayoko pong ikumpara. Parehong trabaho naman po ‘yan. Pero masasabi ko po na sobrang proud ko po sa Lobo na puwede ko pong sabihin na after 20 years, maaalala ko pa rin po itong project na ito at maipagmamalaki ko.
"Kapag naaala ko po siya minsan, napapangiti po talaga ako. Iba po talaga siya... yung sacrifice. At napakaganda po talaga ng pagkakasulat ng Lobo. Yung EP namin, yung production team namin, kung makikita n'yo, hindi na po sila halos nagpapahinga para lang mapaganda ang story. Yun po ang sobrang tine-treasure ko. At masayang-masaya po ako sa ginagawa ko po."
Kinuha rin ang reaksiyon ni Angel tungkol sa nagiging lipatan ng network ng mga artista. Kung siya ay lumipat from Kapuso to Kapamilya, ang dating Kapamilya na si Heart Evengelista ay Kapuso na ngayon.
"Sa totoo lang, wala po yata ako sa posisyon para magsalita dun because hindi naman po ako involved. Pero ang sa akin lang po, kung ako po, magiging masaya po ako kung rerespetuhin po natin ang desisyon ng isang tao. Kung yun po ang sa tingin niya ay tama para sa kanya, respetuhin na lang po natin."