Next month na ang first anniversary bilang magkasintahan nina Toni Gonzaga at Paul Soriano. Sa panayam ng PEP (Philippine Entertainment Portal) kay Toni sa 9501 restaurant ng ABS-CBN during the launching of her third album, Love Is…Toni Gonzaga, ay tinanong namin siya kung ano ang plano nila ni Direk Paul sa nalalapit na anniversary nila.
“Ang plano ko talaga ngayon ay i-promote ang album ko!” natatawang sagot ni Toni. “So, pagtatrabahuan natin ‘yan. So far, right now, I don’t know yet. Di ba sa ganyan naman, usually it's the guy who plans for that? So I don’t wanna plan. I just would expect. Ang plano ko ay ma-surprise.”
What if kung diamond ring yung surprise sa kanya ng boyfriend?
“Hindi… maka-Judy Ann-Ryan naman ang gusto mo!” tawa niya sa kanyang sariling biro. “Hindi ring, bracelet... joke! Hindi ko pa alam. Tingnan natin.”
Nabanggit ni Toni ang magkasintahang sina Judy Ann Santos at Ryan Agoncillo dahil noong kaarawan kasi ng aktres noong May 11 ay niregaluhan siya ng diamond ring ng kasintahan.
Ano ang anniversary gift na gusto ni Toni na matanggap mula kay Paul?
“Talagang ini-expect ko yun dahil kailangan ay pabonggahin niya yun!” tawa niya. “Kailangang ma-surprise ako, maiyak ako, ma-touch ako… Lahat ini-expect ko talaga lahat."
Isu-surprise rin ba niya ang kasintahan?
“Isu-surprise ko siya in my own way. Pero gusto ko mas ma-surprise ako sa surprise niya,” diretso niyang sagot.
Paano kung ring engagement ring at yayain na siyang pakasalan?
"Hindi talaga. Hindi… Alam niya talagang hindi. Ayaw ng Star Records! Magpo-promo kami. Di puwede. Marami pa akong gagawin!” tawa niya ulit.
Speaking of her new album, hindi ba nape-pressure si Toni sa third album niya dahil certified platinum ang kanyang second album na Toni Gonzaga Falling In Love?
“Siyempre, may kaba,” pag-amin ni Toni. “Kaya ayoko nga ng title, e. Kasi you have to live up to it. Although mas nakaka-challenge yun for me. Kung wala namang ganyan, hindi ka matsa-challenge to be better in everything that you do. So I’m just gonna prove it. Kailangang patunayan yun. Kailangan kong pagtrabahuhan.”
Kasama sa Love is…Toni Gonzaga album ang mga kantang “Incapable,” “You’re In Love,” “If I Give You My Heart,” “Take Me, I’ll Follow You,” “Insensitive,” “Steep,” “I’ve Been Waiting,” at “Someone’s Always Saying Goodbye.”
May duet din sina Toni at Sam Milby ng “If Ever You’re In My Arms Again.” Ang “One Hello” ang carrier single ng Love Is…Toni Gonzaga.