"Naging problema rin namin ni Buboy ang tungkol diyan at pinag-usapan namin," lahad ni Sunshine. "Si Buboy mismo ang nagturo sa akin ng sasabihin sa pinsan niyang yun. Naging maingat naman ako sa pagpapaalala sa problemang yun sa pera.

"Besides, ang alam ko, marami pa siyang ibang pinagkakautangan. Nagkapatung-patong na yun. Bakit sa akin isisisi kung nagpakamatay siya? Alam kong usap-usapan sa Cebu 'yan noon at naisip ko na lang, na-blind item pa 'yan dahil nasagap lang ang tsismis. Hindi ko na lang pinansin para hindi na lumaki pa.

"Pero habang tumatagal yata ang pananahimik ko, parang sumosobra na sila, na kinakaya-kaya na lang nila ako. I just find out, may deliberate efforts para sira-siraan ako through hate emails," mariing sabi ng aktres.

POSSIBLE ANNULMENT. Sa paglantad na ito ni Sunshine sa pamamagitan ng written statement sa StarTalk, ito na ang hudyat ng mas matindi pang sigalot na kakaharapin niya na baka humantong na nga sa tuluyang paghihiwalay nila ni Cesar.

"Yun naman yata ang gusto niya, e," sabi ni Sunshine. "Katulad niyan, paano ko masasabing mahal pa niya ako kung hindi siya gumagawa ng paraan para protektahan ako? Sino pa ang magtatanggol sa akin? Wala na ang papa ko. Ang mommy ko, matanda na at mahina, nakakadagdag pa ako ng sama ng loob.

"Alam ni Cesar na ipinaglaban ko siya sa mga magulang ko noon dahil ayaw nila sa kanya, pero pinakasalan ko pa rin siya. Bakit hindi niya magawa sa akin yun ngayon sa mga kamag-anakan niyang sumisira sa akin?

"Nakikipag-usap na talaga ako sa lawyer ko. May nilapitan pa akong isa pang lawyer sa pagsasampa ko ng annulment case. Through these years, sinira nila ang buhay ko. I have to fight back, for the sake of my children," saad ni Sunshine at lalong napahagulhol siya ng iyak.

At press time ay sinusubukan ng PEP na kunin ang panig ni Cesar tungkol sa mga pahayag ni Sunshine.