Kinumusta namin kay Vina Morales ang kanyang love life nang makita namin sa Broadway Centrum kung saan may taping ang Master Showman ni German Moreno. Ngiti lang ang isinukli ni Vina at mukhang sa puntong ito, ililihim muna niya ang identity ng lalaking nagpapatibok sa kanyang puso.
"Nawawalan ba ako?" natatawang sabi ng singer-actress. "Safe answer na muna ako riyan. Kasi, with this one, on and off, on and off. Mahirap pag-usapan. Happy naman ako.
"Sometimes kasi, mutual understanding pa lang, biglang nagkatampuhan. 'Tapos, balikan. Kaya ang ginagawa ko na lang, ini-enjoy ko. Ayoko munang ipamalita kung sino, at kung mayroon nga. Kung mayroon, okey. Kung wala, okey rin lang," nangingiting patuloy ni Vina.
Hindi uso kay Vina ang sinasabing "collect and collect, then select." Hindi raw siya nakikipag-date sa maramihan.
"Lagi akong exclusively dating sa iisa lang," pagdidiin niya.
"Non-showbiz. I can't give you an idea kung sino siya, kasi, hindi pa naman kami stable. Mahirap mag-comment.
"Magsasalita ako kung sino siya, 'tapos, bigla namang mauudlot ang relasyon," sabi pa niya.
SHAINA'S LOVE LIFE. Marami nga ang nagbibiro kay Vina na baka maunahan pa siyang mag-asawa ni Shaina Magdayao, her younger sister, na nasa showbiz din.
"Naku, ayoko!" napapailing na pahayag niya. "Sabi ko kay Shaina, 'Naku, this time, yung ate mo na muna!' Ang feeling ko naman kasi, mauuna ako.
"Wala naman kaming usapan ni Shaina, pero makikita mo na mukhang hindi ako uunahan ng kapatid ko."
"Si Ate Sheila, got married to the son of Kuya Germs, si Federico. I have another younger sister who also got married, so kami na lang ni Shaina ang natitira. Naibibiro ko lang kay Shaina na huwag akong uunahan."
Wala ring masasabing hindi maganda si Vina tungkol sa relasyon nina John Prats at Shaina.
"Lahat naman kasi, dumaraan sa ganyan," aniya. "Crush-crush muna, then, puppy love. Personally, I have nothing against kahit sino, kung sinuman yung magugustuhan ni Shaina. Feelings niya yun, e.
"Kung ano ang nagpapakilig sa kanya, sa kanya lang yun, at hindi ko maibibigay yun, o ng pamilya namin, 'di ba? Kahit friends or fans niya. Right now, she's making things easy.
"Pero, alam mo, marami pang nagkakagusto kay Shaina. My gosh, she's still young. I'm just here for her," banggit pa ni Vina.
Sinabi rin ni Vina sa PEP (Philippine Entertainment Portal) na kung pamimiliin siya, wala siyang pipiliin kina John at Rayver Cruz.
"Desisyon kasi ni Shaina 'yan, eh. Mahirap panghimasukan. At hindi rin natin alam, malay mo, mayroon pa palang iba riyan.
"Pero, hindi naman kailangang ligawan din nila ako para maging malapit ang loob ko sa kanila para sa sister ko. Ang sa akin lang, lahat naman sila, very nice.
Si Shaina sa Lobo ay kinakikitaan na ng maturity. Kung sakaling may daring roles nang dumating for her, how far would she go, sa palagay niya?
"She's doing very well naman with the kind of roles na ibinibigay sa kanya. At saka inaalagaan siya sa ABS-CBN, yung nagma-manage sa kanya roon.
"Alam nila ang mga limitasyon ng kapatid ko. I don't need to tell Shaina what to do. She knows what she's doing," sabi ni Vina.
MISSING ACTING. Nagko-concentrate sa kanyang singing career si Vina. In fact, kagagaling lang niya sa U.S. at Canada for a series of shows.
"Mayroon naman akong A.S.A.P., kapag naririto ako sa bansa, napapanood ako lagi riyan," sabi pa niya. "Ang nami-miss ko ay ang umakting, yung mag-drama.
"'Yun lang ang hinihintay ko sa ngayon. Sana, may dumating ding offer," sabi pa niya.