"Ang panalo ko [as BestActress] four years ago pa, e, sa Ang Tanging Ina," bungad ni Ai-Ai sa PEP (Philippine Entertainment Portal) sa presscon para sa concert niya sa Zirkoh, Timog Avenue, Quezon City, on August 2.
Ano ang reaction niya nang malaman niya ang balitang nominated siya?
"Matagal ko nang alam na nominated ako, nabasa ko sa diyaryo. Ngayon, ibinigay nila sa akin yung certificate na nominated ako. Happy ako. Excited ako kasi may nomination na naman ako. Ibig sabihin, nakita naman nila na nag-effort ako doon sa Ang Cute ng Ina Mo. Gusto ko nga maging Darling of the Press na lang ako para hindi na ako kinakabahan!" natatawang sabi ni Ai-Ai.
Pinaghahandan na ba niya ang kanyang speech kung sakaling siya ang manalo?
"Ako? Oo, kasi kahit hindi ako manalo, at least, kung makalimutan ko, nakakahiya, di ba? Dinudukot ko talaga dito [sa dibdib]. Hindi ako handa. Palagi naman, kapag nominated ako, lagi akong ganun," sabi niya.
Makakalaban ni Ai-Ai for Best Actress sina Bea Alonzo (One More Chance), Cherry Pie Picache (Foster Child), Judy Ann Santos (Sakal, Sakali, Saklolo), Maricel Soriano (A Love Story), at Lorna Tolentino (Katas ng Saudi). Sino para kay Ai-Ai ang matinding kalaban niya?
"Si Bea ‘tsaka si Cherry Pie, Judy Ann, and Maricel Soriano," sagot ng komedyana. "Lahat sila matitindi. Siyempre magagaling silang artista."
Kung hindi siya nominated, sino sa tingin niya ang deserving to win?
"Ah, Inay Mary [Maricel] and si Judy Ann," mabilis niyang tugon.
Feeling ni Ai-Ai, masuwerte talaga siya kapag may "Ina" sa title ng movie niya?
"Oo, suwerte talaga sa akin yung may 'ina'. "Pag lover ako? Konti lang!" sabay tawa niya.
FINDING HER KING. Hindi na rin daw siya nangangarap ng lover ngayon.
"Wala, ayoko na. Ayaw na nila, e. Alangan naman ipilit ko ang sarili ko sa kanila."
May nagsasabi kay Ai-Ai na yung bahay niya sa Ayala Hills is fit for a queen na gaya niya kaya kailangan may "king" din na kasama siya.
"Oo nga, e. Hayaan mo hahanap ako ng king," sabi niya.
Gusto ba ng mga anak niya na magkaroon sila ng "king" sa bahay?
"Depende, for approval. Sasabihin mo muna ang pangalan, pagkatao. ‘Tapos aaprubahan nila. Kapag sinabi boyfriend lang, ‘Ma, bawal asawa.' Ganun na."
SPOOFING ISSUE. Kinuha rin namin ang reaksiyon ni Ai-Ai sa isyu sa pagitan nina Annabelle Rama at Pokwang. Nag-react kasi si Annabelle sa spoof ni Pokwang sa kambal niyang sina Richard at Raymond Gutierrez. Sinabi ng showbiz mom na siya na lang ang i-spoof ni Pokwang at huwag na ang kanyang mga anak.
"Ay, talaga? May nangyaring ganun?" nagulat na tanong ni Ai-Ai. "E, kasi si Tita Annabelle, favorite ko yun, e. Siguro kapag mag-apologize na lang siya [Pokwang] and i-lessen na lang yung pag-ano sa kanya sa script. Hindi ko naman napanood, e. So, hindi ko alam kung paano sasabihin or paano ko siya tuturuan na huwag na lang ganito, huwag ganyan."
Wala naman daw sa script ang ginawang pang-i-spoof ni Pokwang kay Raymond. Adlib na lang daw ni Pokwang ang panggagaya kay Raymond sa show nila ni Pooh sa Music Museum na Poohkwang.
"Ah, oo. Next time huwag na lang mag-adlib. Para walang gulo. Kasi by experience, kasi mararamdaman mo yun. Nasa sa ‘yo yun. Alam mo kung saan ka bibitaw at kung saan ka uurong. Ganun yun.
"Kasi ‘pag sensitive issue, hindi na inaaral ‘yan. Kasi minsan nakakadala, minsan nakaka-offend. E, minsan yung mga tao na nao-offend mo, kasama mo sa industriya, so mahirap talaga. So, dapat konting ano, renda or aralin muna ang mga bagay-bagay," pahayag ni Ai-Ai.
Nagkaroon na ba siya ng experience na may na-offend din siya in her shows?
"Ah, noon, matagal na. Noong bago ako. Pero ‘pag dumating na kasi yung time na hasa ka na, eksperyensado ka na, alam mo kung saan ka bibitaw at saan ka titigil," ani Ai-Ai.