Isang matagumpay na gabi para sa bumubuo ng Entertainment Press Society (Enpress) ang 5th Golden Screen Awards for Movies na ginanap kagabi, June 24, sa Zirkoh Greenhills.
Halos lahat ng winners sa bawat kategorya ay dumating at karamihan din ay nag-stay pa hanggang sa matapos ang mismong event. Kaya naman sa bihirang pagkakataon ay napagsama-sama at nakunan ang mga winner nang sabay-sabay silang umakyat sa stage ng Zirkoh for the photo op.
Mababakas din sa mga nanalo ang kasiyahan na sila ang nabigyan ng pinakamataas na parangal ng Enpress.
Ilan sa mga unang dumating ay ang mga host ng gabing yun na sina John "Sweet" Lapus, JC de Vera, Rufa Mae Quinto, at Rhian Ramos. Gayundin sina Erik Santos, na siyang kumanta sa opening number; ang magkapatid na Glaiza de Castro (na nominee for Best Performance by an Actress in a Leading Role-Drama para sa Still Life) at si Alchris Galura (last year's winner for Best Performance by An Actor in a Leading Role-Drama); ang StarStruck 4 Avengers na sina Stef Prescot at Paulo Avelino, at si Will Sandejas from the movie Sikil.
In full force naman dumating ang cast at production people behind the independent film Pisay, na siyang nag-dominate in this year's Golden Screen Awards. Aside for Best Picture at Best Original Screenplay, ang Pisay director na si Aureaus Solito rin ang nanalong Best Director. Nanalo rin ang Pisay sa iba pang categories, tulad ng Best Original Song, Best Musical Score, at Best Editing.
Late na nang dumating si Aureaus dahil kinailangan pa raw niyang mag-undergo ng minor surgery for his feet, pero nakahabol pa ito nang ang Best Picture for Drama na ang pinarangalan. Siya na ang tumanggap ng award.
Comic relief si Eugene Domingo, na nanalong Best Actress in a Supporting Role for Pisay. Nang tawagin kasi ni Sweet ang pangalan niya ay nagkunwaring na-surprise pa sa award kahit pre-announced na ang winners.
Sa speech ni Eugene ay nasabi niyang noong nag-aaral daw siya ng high school, isa sa mga back subject niya ang Science. Pero ironically, ang role niya as a Science teacher sa Pisay ang nakapagbigay sa kanya ng kanyang unang tropeyo sa Enpress. Bukod sa direktor ng movie, pinasalamatan din ni Eugene ang kaibigang si Cherry Pie Picache at si Direk Andoy Ranay.
Hindi naman nakarating at nagpaabot na lang ng pasasalamat at paumanhin ang nanalong Best Actor in a Supporting Role na si Ricky Davao for Endo. Kasalukuyan pa raw kasi siyang nagte-taping ng Dyesebel noong gabing yun.
Very pretty naman si Rhian Ramos kagabi at masayang-masaya ito sa natanggap na karangalan bilang Breakthrough Performance by An Actress for Ouija. Gayundin si Joem Bascon na nanalo sa kategoryang Breakthrough Performance by An Actor for Batanes.
All the top performance awards were present that night, sa pangunguna nina John Lloyd Cruz, Best Performance by an Actor in a Lead Role-Drama for One More Chance; Cherry Pie Picache, Best Performance by an Actress in a Lead Role-Drama for Foster Child; Jinggoy Estrada, Best Performance by an Actor in a Lead Role-Musical or Comedy for Katas ng Saudi; at si Lorna Tolentino, Best Performance by an Actress in a Lead Role-Musical or Comedy for Katas ng Saudi.
Ito ang first public appearance ni Lorna after her husband, Rudy Fernandez, passed away. Halos magkakasabay na dumating sina LT, Jinggoy and wife Precy Ejercito, Phillip Salvador, at Bong Revilla sa venue.
Ayon kay LT, marami raw silang isina-suggest ng namayapang asawa na si Daboy kay Jinggoy sa kung sino ang puwede nitong maging leading lady for Katas ng Saudi. Pero siya rin daw pala ang kukunin. Ikinuwento rin ni LT na gustung-gusto ni Rudy ang movie na ginawa nila ni Jinggoy dahil nang panoorin daw nila ito, talagang tawa raw nang tawa at na-touch din si Daboy sa ilang eksena.
Malaking bagay rin for LT ang natanggap na karangalan dahil ngayon lang daw siya nakatanggap ng award for a comedy film.
Sa speech ni Jinggoy, natatawang biro nito na ang Katas ng Saudi ang isa sa pinakamatinong movie na ginawa niya. Inihandog niya rin ang pagkapanalo niya sa best friend niyang si Daboy at sa lahat ng OFW.
