Malaking bahagi sa pagkapanalo ni Jinggoy Estrada ng Best Actor award para sa comeback movie niyang Katas ng Saudi ang guidance na ibinigay sa kanya ng director niyang si Jose Javier Reyes.

Dalawang Best Actor trophies na ang nakamit ni Jinggoy. Nanalo siyang Best Actor sa 2007 Metro Manila Film Festival at last June 24 at nakopo naman niya ang Best Actor award sa kategoryang Musical or Comedy mula sa Golden Screen Awards ng Entertainment Press Society.

Since si Direk Joey rin ang director ng My Monster Mom, ang comeback film ni Annabelle Rama, posible rin kaya na magwagi ng Best Actress award si Annabelle?

"I think mas higit pa sa Best Actress ang matatanggap niya kung tanggapin siya ng mga tao bilang komedyante. If this movie makes a lot of money for Regal and for GMA Films, Annabelle would be very well rewarded," pahayag ng award-winning director sa panayam sa kanya ng PEP (Philippine Entertainment Portal).

Aminado naman si Direk Joey na he had lots of fun working with Annabelle.

"Noong una nga, sabi ko, ‘Ano ba itong napasukan ko?' Kasi nga, parang uphill battle ang comeback movie ni Annabelle. Sabi ko, ‘Bahala na si Batman!' But it turned out to be so fine. Ang gaan-gaan niya katrabaho. Walang aberya. Napaka-professional nilang mag-ina [Annabelle and Ruffa Gutierrez]. Walang sutil sa set. Masaya lahat. It was a nice experience," lahad ng direktor.

Hindi naman daw kasali sa pagdidirek niya na kailangan manalo ng award ang artistang idinidirek niya. Kung nanalo si Jinggoy, nagkataon lang daw na siya ang nagdirek. Ganito rin ang feeling niya para kay Tita Annabelle.

Sabi ni Direk, "I just want to get the best of Annabelle and give her a good project. Sobrang happy ako working with her. At the start, touch and go ‘yan. Tatantiyahin mo kung hanggang saan, kung maitutulak ko siya, kung ano ang makukuha ko sa kanya.

"Until I realized, this is the way to work with Annabelle. ‘Pag nahuli mo na ang tamang timplada, makukuha mo na ang gusto mo at ang importante naman, nagkaroon siya ng confidence sa sarili niya na kaya niyang i-deliver yung trabahong ini-expect sa kanya.

"She really worked very hard for this. Alam niya ang mga eksenang kukunan. Kinukulit niya ang mga tao. Kung ano ang costume niya. Pagdating niya sa set, handa na siya. Ang trabaho ko na lang ay subaybayan siya. Unlike sa ibang artista na dumarating sa set na hindi alam ang gagawin. Ni hindi nabasa ang script. Siya, kabisado niya ang linya. Alam niya ang kuwento kahit pagbalik-baliktarin mo. Sasabayan mo na lang siya,"

Magkakaroon ba ng Part 2 ng My Monster Mom?

"Tingnan natin kasi ako, kung may sequel, okay fine. Tingnan muna natin kung ano ang kalalabasan nito, pero may plano na na sequel. ‘Pag napanood ninyo ang pelikula, malalaman ninyo kung paano magkakaroon ng sequel," pahayag ni Direk Joey.