Last Tuesday, July 8, ay isiniwalat ni Eric Quizon sa The Ricky Lo Exclusives na halos lahat ng mga babaeng naugnay sa kanyang ama, ang Comedy King na si Dolphy, ay nagpaunlak ng interview para sa tell-all autobiography ng ama na ilu-launch in time for the Comedy King's birthday. Pero bukod-tangi lang daw ang dating asawa ni Dolphy na si Alma Moreno ang hindi pumayag sa request nilang interview.
Kaya naman sa live interview ng Startalk kay Ness (palayaw ni Alma) last Saturday, July 12, ay tinanong ng hosts na sina Butch Francisco at Lolit Solis kung bakit tumanggi siyang ma-interview para sa libro. May sama ng loob ba siya sa ama ng anak niyang si Vandolph kung kaya't hindi siya pumayag na magpa-interview at mapasama ang naging relationship nila sa naturang libro?
"Siguro, sa akin na lang yun," sagot ni Ness. "Kung puwede, akin na lang para sa proteksiyon na rin ng anak ko. Kung may isyu, walang isyu sa akin. Kumbaga, kung memories na kung ano ang sa akin, ke maganda or hindi, akin na lang."
But Butch insisted that although his co-host Lolit may know everything from the beginning ng kuwento ng buhay noon ni Alma with Dolphy, ang mga huling bahagi ng pagsasama lang ang naabutan niya. So nagtataka lang si Butch, what is there to keep private about?
"Siguro naman, alam na nilang lahat," ani Ness.
Dagdag ni Lolit, ayaw na rin sabihin ni Ness ang real reason kung bakit nga sila nagkahiwalay ni Dolphy noon.
"And at the same time," dagdag ni Ness, "kay Vandolph na rin. Pero kung galit ako kay Dolphy or inisnab ko si Dolphy, hindi po talaga... Ang sa akin, para na rin sa katahimikan at maintindihan ni Eric. Actually, ang kasalanan ko lang, hindi ko diniretsong sabihan si Eric; actually, si Tita Nene [Riego, Dolphy's manager], sinabihan ko rin."
DABOY & PIDOL. Nakita raw ni Lolit kung paano naapektuhan si Ness nang mamatay ang dati nitong ka-live-in na si Rudy Fernandez. Kung sakali kaya't ganun din ang mangyari kay Dolphy, magiging ganoon din kaya ang reaction ni Alma 'tulad noong kay Daboy?
"Ha? Ah, oo...oo!" tila nagulat na sabi ni Alma. "Siyempre, naging tatay ng anak ko ‘yan. Pupunta ako bilang ako ay tanging sumusuporta sa mga anak ko. Like kay Mark [Anthony Fernandez, Alma's son with Daboy], nandoon ako and kasi kami ni Rudy, naging barkada. Kahit wala na, nandoon pa rin yung communication. ‘Tapos si LT [Lorna Tolentino, Daboy's wife], talagang naging best friend, kumare [ko]. Like noong may problema ako kay Mark, nandoon siya."
‘
Tinanong ni Lolit kay Ness, kapag may problema raw ba siya kay Vandolph ay hindi sila nakakapag-bonding ni Dolphy?
"Well, sa totoo lang, telephone," saad ni Alma. "Nag-uusap kami sa telephone, pero hindi kasing dalas ng usap namin... Iba kasi ang relationship namin nina LT at Daboy, barkada."
ALMA'S LIFE STORY. May nasagap naman daw na information noon si Butch sa GMA-7, kung saan, nakaplano raw sanang gawin ang life story ni Alma noon para sa dating drama anthology na Magpakailanman, pero hindi natuloy. Tinanong ni Butch ang konsehala ng Parañaque City kung pumayag noon si Dolphy na makasama siya sa life story ni Ness ?
"Hindi siya pumayag," maagap na pag-amin niya. "Pumayag si Rudy, pumayag si Joey [Marquez, her ex-husband]."
Sundot na tanong ni Butch, ito kaya ang dahilan kung bakit hindi siya pumayag na magpa-interview sa autobiography ni Dolphy?
"Well, basta tahimik na lang po ako. Para na lang sa anak ko. Alam na siguro ni Dolphy kung bakit," paiwas na sagot ni Alma.
Sumama ba ang loob niya sa hindi pagpayag ni Dolphy noon?
"Nasaktan lang ako, pero wala na sa akin yun ngayon. Kasi siguro may dahilan din si Dolphy, so nirespeto ko yun. Now naman, may sarili rin akong dahilan, so sana irespeto rin nila yun."
Ayon kay Butch, mas lalo raw tuloy siyang na-curious. Pero ipinaliwanag ni Lolit na siguro raw dahil tell-all ang libro, may mga bagay na private na para kay Ness, na ayaw na niyang mabanggit o mapag-usapan pa.
Sinegundahan naman ito ni Ness sa pagsasabing, "Yeah, para sa katahimikan na rin ng lahat. Kasi alam n'yo naman dito, katulad ngayon, iba na naman. Lalo na kasi ako, iba na kasi, huwag na nating edit, ‘eto, ‘eto...so, huwag na lang."
Kung nagkataon daw kayang si Daboy ang maisipang gawan ng libro ni LT, papayag ba si Ness na magpa-interview?
"Oo naman!" mabilis niyang sagot. "Lalo na si Daboy, e, diretsong magsalita sa akin yun. ‘Ness, gagawa ako ng ganito-ganyan..."
Hindi kaya inconsistent siya sa puntong yun, sabi ni Butch, dahil kay Dolphy ay tumanggi siya?
"E, iba naman," sabi niya. "Itong si Dolphy naman, hindi naman ako tinanong or kinausap, e."
May hurt feelings pa ba si Ness ?
"Ako, hurt? Wala, wala na! Basta ako, anumang painful memories, wala na. Masaya ako ngayon sa anak ko. Si Dolphy, masaya rin, walang problema. So wala na talaga, as in wala."
LORNA & ZSA ZSA. Kung si Lorna ay kaibigan ni Alma, kumusta naman ag relasyon ni Ness sa karelasyon ni Dolphy na si Zsa Zsa Padilla, na incidentally ay pinsan din ni LT?
"Wala lang...hi and hello," sagot ni Alma.
Napa-"gano'n?" si Lolit dahil parang non-entity raw ang dating ni Zsa Zsa kay Alma.
"Hindi naman," paglilinaw ni Alma. "Hindi naman kami nagkikita. At saka kami ni Lorna, chika talaga. Ninang siya ni Yeoj. Kumbaga, sa madaling salita, yung sa amin ni Lorna, iba po talaga. Yung feeling ko, hindi ko ma-explain.
"Kasi ako naman, kapag nagsalita, yung feeling ko, wala naman akong ililihim, e. Alam na ng publiko po yun, lalo na ngayon, birthday ni Dolphy [sa July 25], so happy birthday! At si Eric, sorry po talaga. Lalo na ‘yang si Eric, close kami niyan. Sa pamilya, kung nasaktan ko man at hindi ako nagpa-interview, sana maintindihan n'yo ako."
WHY SHE REFUSED. Nagkausap naman daw sila ni Eric sa phone, pero hindi raw niya nagawang sabihin dito nang diretso.
"Siguro yun talaga ang pagkakamali ko, hindi ko nagawang sabihin sa kanya nang diretso. Nahiya ako."
Tanggap naman daw ni Ness na kahit hindi siya nag-grant ng interview, posibleng mailalabas pa rin ang naging buhay nila ni Dolphy sa naturang libro. If ever, hindi naman daw siya maghahabol.
Butch then asked kung dadalo ba siya sa launching ng libro ni Dolphy.
"Kung invited ba ako," sagot niya. "Pero madali lang ‘yan, kung nandito po ako at kung imbitado ako, darating ako. Pero as Secretary General ng Councilor's League, palagi ho akong wala talaga. Mindanao, Cotobato, Naga City... Palagi akong umiikot, totoo po ‘yan. Kung nandito ako sa July 24 at imbitado ako, pupunta ako, bakit hindi?"
HER MEMORIES OF DOLPHY. Tinanong ni Lolit kung ano ang isang bagay kay Dolphy ang hindi niya makakalimutan?
"Mabait... Mabait na tatay kay Vandolph."
"Pero hindi mabait na lover?" tanong ni Lolit.
"Mabait," sagot ni Alma.
Ano ba ang tungkol sa buhay ni Dolphy ang alam ni Alma na hindi alam ng halos lahat?
"Well, for one thing, si Dolphy, ang alam ko, sa TV masyado siyang nagdyo-joke, di ba? Komedyante siya. Pero sa personal, seryoso siya. At doon ko nakita na naka-Amerikana siya, pero sa eroplano, nagbubuhat siya kay Vandolph. Kumbaga, ibang-iba siya. At saka talagang mabait si Dolphy, super bait," lahad ni Alma.
Eight years din daw silang nagsama. When asked kung ilang
taon ang maligaya at hindi, masaya raw lahat para kay Ness.
"Naramdaman ko na maligaya ang lahat kaya nga hindi ko rin akalain..." nabitin niyang sagot at saka siya tumawa. "Huwag na, joke na lang po yun."
Sabi naman ni Lolit, yung sa mga huling taon ng eight years na pagsasama ang medyo nagdududa na si Alma kung kaya't hindi na siya masaya. Pero tinuldukan na agad ito ni Alma. Aniya, "Matagal na yun, hayaan na natin. Masaya na si Dolphy sa buhay niya. Masaya rin ako, so tama na."
Pinaalam ni Lolit na magpinsan sina Lorna at Zsa Zsa. Ano ang pakiramdam ni Alma na kung si Rudy ay napunta kay LT, si Dolphy naman ay napunta kay Zsa Zsa?
Medyo natigilan si Ness sa puntong ito bago nagpatuloy na sumagot. Aniya, "E, kumbaga, may sarili na ako. Nag-move on na ako. Masaya na ako. Kumbaga, kung anuman yung nakaraan, huwag na nating ungkatin yun."
Ano ang wish ni Alma for Dolphy, who is turning 80 years old on July 25?
"Ang wish ko sa kanya, good health. Sana hindi siya magkasakit. Sana malakas pa rin siya dahil para na rin sa anak ko at sa mga anak niya na sobrang malapit sa kanya. Kaya Dolphy, alagaan mo ‘yang health mo."