Best Actress award na lang daw ang kulang kay Anne Curtis kaya gusto niyang maging maganda ang performance niya sa pelikulang Baler ng Viva Films, na isa sa official entries sa 2008 Metro Manila Film Festival (MMFF).
Gagampanan ni Anne ang papel ni Feliza, isang Pinay na umibig sa isang Filipino-Spanish soldier na si Celso, to be played by Jericho Rosales. Pilit nilang itinatago ang kanilang relasyon dahil magiging tutol dito ang ama ni Feliza na si Nanding (Phillip Salvador), na miyembro ng resistance movement laban sa Spanish military.
Ayon kay Anne, pinaka-challenging role na raw niya itong Baler. Talagang gagawin daw niya ang kanyang makakaya para makapagbigay siya ng mahusay na performance. Una raw na gagawin niya ay ang maayos ang kanyang pananalita ng Tagalog.
"I admit na sobrang baluktot pa rin akong mag-Tagalog. Pero nakakapagsalita naman ako, yun nga lang, may accent pa rin. Gusto ko is to tone down the accent which is very hard talaga, kasi hindi ko naman tina-try.
"Ngayon, sinusubukan ko na mag-Tagalog minus the accent. Kasi ang role ko dito is a Filipina and I need to look and act credible for the role. Pero with the help naman of some people, makukuha ko ang essence nung role. May ilang weeks naman kami to prepare and I really need to do good sa movie na ito kung gusto kong matupad ang wish ko na maging best actress, di ba?" nakangiting sabi ni Anne sa panayam sa kanya ng PEP (Philippine Entertainment Portal) sa story conference ng Baler.
READY FOR LOVE SCENES. Huling napanood si Anne sa pelikulang When Love Begins ng Star Cinema, kung saan nakatambal naman niya si Aga Muhlach. Sa naturang pelikula ay first time na makipag-love scene si Anne. Kaya hindi na raw siya mahihiya if ever magkaroon sila ni Jericho ng love scene sa Baler.
"Okay lang naman for me kasi part ‘yan ng pagiging artista namin. I've come to realize na kailangan lahat ng scenes ay susubukan kong gawin. May matututunan ka naman sa mga ‘yon, e.
"When I first did a love scene with Aga, hindi mawawala yung kaba talaga. Pero after the scene, okay naman pala, hindi naman pala nakakatakot gawin. Nagiging professional lang naman tayo lahat.
"Kaya nga if ever na may ganyang scenes sa Baler, I'm open to it because Echo is a very good actor. I know na he will not take advantage of me."
Inamin ni Anne na naging big fan siya ng soap drama na Pangako Sa ‘Yo nina Jericho at Kristine Hermosa. Dahil nga sa husay ni Echo ay pinangarap ni Anne na makatrabaho ito balang-araw.
"Before kasi nasa GMA-7 pa ako when I became a fan of Pangako Sa ‘Yo. I always admired Echo for being a good actor kaya sino ang ayaw siyang katrabaho, di ba? Now, parang dream come true to work with him. E, dati, nagkakasalubong lang kami sa mga guestings namin sa ABS-CBN. Hanggang ‘hi' and ‘hello' lang kami talaga. Now, we're doing a movie kaya we're both on Cloud Nine."
Si Anne Curtis din ang bida sa bagong fantaserye ng ABS-CBN na Dyosa.