Sa Bernal Gallery ng UP Film Institute (Cine Adarna) sa Diliman nakausap ng PEP (Philippine Entertainment Portal) si Paolo Paraiso kaugnay ng controversial kissing scenes nila ng co-actor niya sa preview ng Imoral na si Arnold Reyes.
"Hinding-hindi ko pagsisisihan ang ganitong requirements, kasi ginawa ko yun as an actor. Hindi naman dahil lang sa gusto kong makipaglaplapan sa kapwa ko lalaki," paliwanag ni Paolo.
WHAT MYLENE SAID. Ito'y may kinalaman din sa nasabi ng ex-lover niyang si Mylene Dizon na baka nga pagsisihan din ni Paolo ang pagtugon sa ganitong mga eksena, gaya ng nangyari sa kanya nang ma-involve siya sa lesbian sex scenes naman sa isa pang indie film, Rome and Juliet.
"Nang makausap ko si Mylene, definitely, ang point lang niya ay yung baka ako ma-typecast. She's scared of that, na baka puro gay roles na ang ibigay sa akin. Sabi ko naman, malabong ganoon ang maging diskarte, kasi may iba pa namang nag-o-offer sa akin ng ibang klaseng roles. Trabaho lang naman 'yan.
"Madaling maintindihan 'yan ni Mylene, for she's also an actress. Not for anything else. Wala namang selos yun sa kanya. Bakit magseselos?" natatawang sabi ni Paolo.
Idiniin niyang maganda pa rin ang pagsasama nila ni Mylene kahit may kanya-kanya na silang buhay. But they see to it na nagkikita sila, kasama ang kanilang anak na si Tomas, every now and then.
"Yung tungkol sa pinagsisihan niya yung ginawa niya sa Rome and Juliet, mas mabuting itanong mo na lang kay Mylene ang tungkol doon. Sabi nga niya, mahabang kuwento. So, let her tell the story. Hindi naman ako ang naka-feel at naka-experience niyon, e. Siya lang ang makakasagot ng mga tanong mo," saad ng aktor.
X-RATED. Kinabukasan, nang ipa-review ang Imoral sa MTRCB (Movie and Television Review and Classification Board) for the rating, ay na-X ito. Pero agad ay binawi ang X-rating at naging R-18 na siya dahil nga sa depensa ng isa sa tatlong nag-review rito, ang dating aktres na si Amalia Fuentes.
"Kung totally na-X siya, we'll just have to appeal siguro, and respect the decision of the MTRCB people," banggit ni Paolo. "At least, agad-agad they changed their judgment. After the discussions, nalinawan siguro sila sa merits ng movie para ipapasa na lang nila.
"Sa akin kasi, siyempre gusto kong ipaglaban ang
pelikula. But since binawi na nila ang X-rating, maipalalabas na ang movie,
and I'm so happy with that," pahayag pa niya.
DOING THE GAY SCENE. Tiyak na pagpipiyestahan at pag-uusapan din ang mga maiinit nilang eksena ni Arnold Reyes sa nabanggit na pelikula, tungkol sa set-up na ang isang heterosexual couple ay pumayag na makasama sa iisang bubong ang gay lover ng lalaki.
"Nang mabasa ko nang buung-buo ang script ng Imoral, immediately hindi ko na binitiwan," lahad ni Paolo. "At gusto kong gawin ang gay kissing scenes dahil kailangan sa istorya, at magbibigay ng justification sa characters namin as gay lovers.
"Yun lang ang pinaniniwalaan ko nang gawin ko yun, at nakahanda ako sa repercussions. Alam ko namang pag-uusapan yun, and I don't really mind. Lahat naman ng itatanong nila sa akin about that ay kaya kong panindigan," pagwawakas ni Paolo.