Everything is set para sa bonggang first anniversary presentation ng Saturday showbiz-oriented talk sa ABS-CBN hosted by Toni Gonzaga, Mariel Rodriguez, Bianca Gonzalez, and Luis Manzano, ang Entertainment Live! Umuusok ang mga magaganap na harapan ng mga artistang nagkaroon ng kontrobersiya at isyu sa mga host ng Entertainment Live! ngayong Sabado, August 16, pagkatapos ng Wowowee.
For the first time, maghaharap ang iniintriga noon na sina Bianca at KC Concepcion sa Entertainment Live! Matatandaan na nagkaroon ng isyu between Bianca and KC dahil sa pagkaka-link nila pareho sa direktor na si Lino Cayetano.
Dalawang Sabado na ang nakararaan, nakunan ng pahayag si KC sa pagpayag niya na ma-interview ni Bianca. Naganap ang pahayag na ito ni KC sa presscon ng movie nila ni Richard Gutierrez na For The First Time ng Star Cinema. And from Bianca, ni-reveal naman niya ang kauna-unahan nilang paghaharap ni KC sa isang hindi sinasadyang pagkikita, kasama ang magkasintahang Ryan Agoncillo at Judy Ann Santos.
May one-one interview naman si Mariel sa kanyang paboritong aktres na si Claudine Barretto. Ito rin ang kauna-unahang appearance ni Claudine sa isang showbiz-oriented talk show pagkatapos sumabog ang kontrobersiya sa kanila ni Angel Locsin.
And speaking of Angel, ibubulgar naman ng co-host ng Entertainment Live! na si Luis Manzano sa una nilang paghaharap ang mga sikreto ng young actress. Ito rin ang unang pagkakataon na mapapanood na magkasama ang nababalitang magkasintahan na sina Angel at Luis sa isang programa. Bukod sa mga sikreto ni Angel, abangan din ang iba pang rebelasyon sa kanila ni Luis.
Maghaharap din sa unang pagkakataon ang dalawang babaeng nagkaroon ng ugnayan sa Fil-Am actor na si Sam Milby na sina Anne Curtis at Entertainment Live! host na si Toni. Ito ang kauna-unahang engkuwentrong magaganap sa ex at current special someone ni Sam sa isang mainit na tsikahan.
Darating din ang Asia's Nightingale na si Lani Misalucha sa first anniversary celebration ng Entertainment Live! First time niyang uupo at magigisa sa mga isyu ng live sa pang-Sabadong showbiz-oriented talk show ng ABS-CBN.
Bukod sa lahat ng nabanggit, inaasahan din ang pagdating ng maraming Kapamilya stars at iba pang mga sorpresa sa unang anibersaryo ng Entertainment Live!