As early as 12 noon kanina, August 16, sa SMX Convention Center ng SM Mall of Asia, both sides ng venue ay puno na ng pila ng mga fans na manonood sa Final Showdown ng Pinoy Idol.

Halos napuno ang venue that can accommodate as many as 8,000 people. Pero may mga area na kailangang iwasan ang mga camera at nag-set pa ng stage na doon nag-perform ang mga guest bands, plus the stage for the three judges na sina Ogie Alcasid, Jolina Magdangal, and Wyngard Tracy.

Maganda ang opening number na "Salamat Musika" na kinanta ng Final 3 na sina Jayann Bautista, Gretchen Espina, at Ram Chaves. Kasama rin nila ang iba pang 12 finalists na sina Daryl Celis, Kid Camaya, Warren Antig, Penelope, Toffer Rei, Sue Ellen, Robby Navarro, Mae Flores, and Jeni Rawolle, with the UP Manila Chorale at Magnificat Chorale.

Kinatawan ni Jayann ang Central Luzon, si Gretchen ang Eastern Visayas, at si Ram ang Mindanao.

Ipinahayag ng Pinoy Idol host na si Raymond Gutierrez kung paano maglalaban-laban ang Final 3. Three rounds ang pagkanta nila; first round ay Judges' choice, second round ay Mentors' choice, at third round ay song of their choice.

Bago nagsimulang kumanta ang Final 3, ipinakita muna ang homecoming nila sa kani-kanilang bayan kung saan in-announce kung ano ang mga kantang pinili para sa kanila ng mga judges.

Si Jayann ang unang kumanta sa first round na pinili para sa kanya ni Wyngard, ang "I'll Never Love This Way Again." Pinili naman ni Ogie para kay Ram ang "Bridge Over Troubled Water," at "For Your Eyes Only" ang pinili ni Jolina for Gretchen.

Intermission ang pagkanta ni Basil Valdez ng "Let The Pain Remain" with Gretchen, Ram, and Jayann.

Sa second round, ang piniling mentor ni Ram ay si Jaya na ang pinakanta sa kanya ay "I Don't Wanna Miss A Thing." Si Regine Velasquez naman ang favorite mentor ni Jayann na ang pinakanta sa kanya ay "You'll Never Walk Alone," na winning song din noon ni Regine sa isang international singing competition. Si Jaya rin ang favorite mentor ni Gretchen at ang pinakanta sa kanya ay "Stand Up For Love."

Napakaganda naman ng rendition ni Regine Velasquez kasama sina Jayann, Gretchen, at Ram ng "Go the Distance" at hindi napigilan ni Ogie na bigyan ng standing ovation ang kanyang lady love.

Sa next intermission number, sunud-sunod namang nagparinig ng kani-kanilang songs ang South Border, Itchyworms, Freestyle, at Cueshe.

Sa third round, kinanta ni Gretchen ang pinili niyang song na "Ngayon" with the UP Chorus Chorale.

Habang nagsi-set up ang banda na makakasama ni Ram, off-camera ay tinanong muna ni Raymond and his co-hosts Karylle and Rhian Ramos ang mga judges kung ano ang masasabi nila, in general, sa performance ng Final 3.

Ayon kay Ogie, much better daw ang performance nila ngayon, hindi tulad noong last week na bitin ang pagkanta ng Final 5 na parang hindi sila lumalaban sa competition. Kay Jolina, nararamdaman na raw niya na may competition na, naroon na lahat ang mga hinahanap niyang paglaban ng bawat isa since day one. Nag-react ang audience nang sabihin ni Wyngard na "hindi sila magaling," at nagpalakpakan sila nang sundan niya ito ng "dahil saksakan sila ng galing, we were impressed!"

Bitin naman sa audience nang kumanta na si Ram ng pinili niyang "Handog," sana raw ay tinapos nito ang kanta.