Hindi na raw muna type ng sexy actor na si Allen Dizon na gumanap ng gay roles. Pagkatapos ng Paupahan na iprinodyus ng kanyang sariling film outfit, kung saan isang aging male starlet na nagko-call boy ang kanyang ginampanan, ayaw na muna niyang gumanap ng mga ganitong uri ng papel, ayon sa kanyang manager na si Dennis Evangelista. Sa Paupahan nga kasi, may matinding sodomy scene si Allen at ayaw na muna niyang ulitin yung mga ganoong eksena.

Yung pelikulang Alaga sana ang follow-up movie ng ATD Films at si Allen nga sana ang gaganap na gay. Magkakaroon din siya ng love scene sa isang dapat ay lover niya sa istorya.

"Tumanggi si Allen, ibang project naman daw yung gawin namin," sabi ng manager ng actor-producer. "Ako naman, naiintindihan ko siya. Ngayon kasi, dumami na ang kanyang public at kasama na yung mga kababayan, mga kaibigan, at mga kamag-anak ang nanonood sa kanyang mga pelikula. Gusto naman ni Allen na makita siya sa ibang role na matinding acting ability ang ipakikita niya. I agree na isang tunay na aktor si Allen kaya nga ako mismo ang naghanap ng ibang project na isusunod namin sa Paupahan."

Isang dahilan pa raw ay gusto na talagang mamili ni Allen ng mga gagampanan nitong roles.  Siya nga naman ang producer kaya talagang ito na yung pagkakataon na he can choose the roles that he will play.

Isa pang dahilan, ayon kay Dennis, ay yung obserbasyon mismo ni Allen at ng maraming indie-movie aficionados na talaga namang talamak na ang gay films. Lahat na lang daw ng indie films ay tumatalakay sa kabaklaan na umabot sa point na nagpapaligsahan na sa mga ipakikitang maseselang eksena.