Nangingiti na lang si Diana Zubiri kapag tinatanong siya tungkol sa nababalitang panliligaw diumano ni Marvin Agustin kay Katrina Halili.
Noong magsimula kasi ang GMA Sine Novela na Gaano Kadalas Ang Minsan ay nabalitang pinopormahan daw ni Marvin itong si Diana. Kahit nga may bali-balitang may non-showbiz boyfriend si Diana, marami pa rin ang pumatol sa Diana-Marvin link at nakatulong naman iyon sa magandang ratings ng show.
Ngayon nga ay nabaling na ang pagtingin ni Marvin kay Katrina at ayon na rin kay Katrina ay madalas daw ang communication nila ngayon ni Marvin.
Nang hingan ng PEP (Philippine Entertainment Portal) ng komento si Diana, sinabi na lang nito na wala raw siyang alam tungkol sa Marvin at Katrina ligawan.
"Dapat ang tinatanong n'yo diyan si Marvin at hindi ako," sabay ngiti ni Diana.
"Napanood ko naman yung mga sinabi ni Katrina at siguro yun na nga ang nangyayari sa kanila. Pero as far as I am concerned, hindi naman nanligaw si Marvin sa akin, e. Gano'n lang talaga siya. Mabait at malambing lang na tao si Marvin sa mga babae."
Dagdag din ni Diana na hindi naman daw sila gano'n ka-close ni Katrina para matanong niya ito regarding kay Marvin. Kaya awkward daw kung bigla niya itong kausapin tungkol sa kumalat na tsismis.
"Kami naman ni Kat, nagkakausap lang naman kami kapag may mga events ang GMA-7 at kapag sabay kaming nagge-guest sa isang show. Okey naman kami pero hindi kami super close. Kilala n'yo naman ang mga close ko, ‘di ba?
"Kaya nakakahiya naman na bigla ko na lang siyang tanungin about Marvin, ‘di ba? Parang hindi tama. Baka iba pa ang isipin niya, mahirap na. Kaya pabayaan na lang natin sila na mag-enjoy sa isa't isa."
Tinanong na ba niya si Marvin tungkol dito?
"Hindi naman, kasi wala naman ‘yon sa isip ko kapag nagte-taping kami. Not unless si Marvin ang mag-open up, baka maging topic of conversation namin iyon.
"Pero hindi naman siya nagsasabi kaya bakit ko pa iyon itatanong sa kanya, ‘di ba? Baka isipin pa niya na naninita ako! Bakit naman, ‘di ba?" sabay tawa niya.
Anyway, natutuwa si Diana dahil ang taas ng ratings parati ng Gaano Kadalas Ang Minsan. Magsu-shoot nga raw sila ng ilang eksena sa Hong Kong at doon kukunan ang ilang matitinding highlights ng sine novela na ito ng GMA-7.