Noong huling makausap ng PEP (Philippine Entertainment Portal) ang Box-Office King na si John Lloyd Cruz, he was so vocal saying na kung meron man daw siyang gustong gawin ngayon, ito ay ang matuloy na niyang gawin ang pelikula niya with Gov. Vilma Santos-Recto.
Sa pagkukuwento nga ni John Lloyd during the press conference for I Love Betty La Fea sa Ecomoda Manila Studio sa 11th floor ng ELJ Bldg. ng ABS-CBN, mukhang maga-grant na nga ang wish na ito ni John Lloyd.
Aniya, "Mauunang mag-shoot yung movie with Gov. Vi. By November, pupunta kami ng New York para mag-shoot. Ang huli kong narinig sa Star Cinema, mauunang mag-shoot ang Vilma movie in terms of filming, pero, sa ipapalabas, kasi, Valentine's presentation yung Sarah Geronimo movie naming muli."
Dahil sa sinabing yun ni John Lloyd, pumasok agad sa isipan ng entertainment press ang possibility na magkakatapatan ang KC-Richard movie na pang-Valentine's offering at produce naman ng GMA Films this time sa isang Star Cinema Valentine's offering.
Pero ayon kay John Lloyd, "Well, hindi ko alam kung head-on talaga ang pagtatapat. Feeling ko naman, may magbibigay."
JOHN LLOYD IS ARMANDO. Wala na ngang duda, si John Lloyd Cruz na nga ang official na napili to play the role of "Armando" in I Love Betty La-Fea as Bea Alonzo's leading man. At dahil ilang beses na siyang tinanong tungkol dito in the past, pero, patuloy niyang sinasabing wala pa siyang alam, idinipensa ni John Lloyd ang sarili na hindi naman panloloko yun sa part nila.
"Hindi naman kami nanloko. Nalaman ko naman talaga bago ipalabas yung A Very Special Love and siyempre, kailangan din naman akong maintindihan na kailangan kong pangalagaan yung kapakanan ng pelikula.
"Secondly, ginawa nilang in sequence, e. Inuna si Bea na ipakilala dahil siyempre, siya si Betty La Fea. Then, si Ruffa Gutierrez and then, Vhong Navarro. ‘Tapos, ako. So, parang may ganoong effect."
Binigyang-linaw rin ni John Lloyd ang impression sa kanya noong una na tila hindi siya ganoon ka-happy na ang role ni Armando ang gagawin niya at ang Betty La Fea ang next project niya. May nagsabi pang kung si John Lloyd ang masusunod, mas gusto niyang iba naman sana ang material na gagawin niya at makakapareha.
"'Yung dati kasi, noong hindi ko pa alam, kung papamiliin ka, baka puwedeng...kasi, meron kang sarili na gusto mong mangyari. Pero, kapag hinarap na sa ‘yo, sa palad mo. Yung offer, yung story, yung character, mapapaisip ka rin, e. Parang sa part mo, maggo-go rin yung isine-set mo.
"At sa akin, malaking impact talaga sa akin na marami ang naghihintay sa amin. Marami ang naghahanap ng project na kami pa rin ni Bea ang magkasama."
Pero hindi nga maikakaila na ang clamor talaga ng tao kahit maraming leading men ng Kapamilya network na pinagpipilian, siya pa rin talaga ang majority choice. At natutuwa nga raw rito.
"Ang balita ko nga, nagkaroon ng parang voting, at yun, lumabas nga raw na ang laki nga raw ng diperensiya sa boto. E, siyempre, ako naman, gusto ko lang ibalik. For eight years nga, sinuportahan kami ni Bea bilang team-up."
Dugtong pa niya, "Kasi, hindi sila naging masaya sa Maging Sino Ka Man, yung expectation nila, parang hindi na-meet. So, ito, panibagong vehicle para sa team-up namin na talagang nanggigigil sila na please, gawin n'yo ‘yan, gawin n'yo yan!
"At ayaw naman naming i-let down yung mga sumuporta sa amin sa loob ng ganoong kahabang panahon. And somehow, we owe it to them. Ang laki ng ginampanan nilang papel sa amin kung kaya kami tumagal ng ganito katagal na panahon."
HAPPY SUPPORTING BEA. Masaya naman daw siya na this time, lumalabas na mas suporta naman siya ngayon kay Bea Alonzo kung ikukumpara nga naman from their past soap-opera na tila siya yung mas title role or mas highlighted.
"Oo naman, kayang-kaya kong sabihin na walang problema sa akin yun. Without batting an eyelash. Wala kasing kaso sa akin yun. Kasi ako, alam ko, ngayon kami ni Bea mula pa noon hanggang ngayon and in the future, gagawa kami ng project or separately, alam ko sa sarili ko, kahit title role, pareho lang tayo. Ganoon kami. Hindi namin pinaparamdam sa isa't isa na mas mataas ako sa ‘yo or show ko ‘to."
Hindi naman niya inalis na malaking factor din sa confidence na meron siya ngayon, ang pagiging super hit ng recent movie nga niya with Sarah kunsaan, na-test niyang kahit outside the love team, kaya naman pala niya.
"Oo, siguro malaking factor rin yun. Kasi kung hindi ko pa kaya, parang baka medyo may insecurities ng konti. Parang bakit ganyan? Pero siyempre, in every team-up naman, lalaki at babae, unahin mo ang babae, suportahan mo ang babae. Lalaki ka, e."