"All of a sudden, I'm a star!" bulalas na biro ni John Lloyd Cruz nang kunin ng PEP (Philippine Entertainment Portal) ang reaksyon niya sa maraming titulo na ikinakabit sa pangalan niya, gaya ng Box-Office King at ng "Billion-Peso Man" dahil sa matagumpay na endorsement niya ng Biogesic.
Sa kabila nito, walang pressure na nararamdaman si John Lloyd sa mga title na ibinibigay sa kanya.
"Ano lang ‘yan, title. Pero, siyempre, laging masarap ang pakiramdam kapag may mga magagandang title na naa-associate sa pangalan mo. Pero, siyempre, katumbas noon, may mabibigat din na expectations. Kasi para bang ang susunod mong pelikula, kung hindi niya mapantayan, dapat malampasan man lang. Dapat malampansan yung huli mong ginawa.
"So, hindi siya madaling marating. Maganda po pero hindi siya madaling marinig, and, ah, well... pasalamat. Maraming salamat dahil tuluy-tuloy ang blessings. Tuluy-tuloy ang magagandang nagyayari. Para bang hindi tumitigil.
"Pinag-usapan nga ng makeup artist ko at ako nung isang beses, parang kapag nagkatrabaho, sunud-sunod. Parang hindi puwede yung tama lang. 'Pag nagkaroon ka ng trabaho, dagsa naman. Yung sa akin, when it rains, it pours."
Mas okey na yun kesa wala siyang ginagawa, di ba?
"Oo, pero ayoko namang mangyari na mapabayaan yung iba, yung ibang trabaho because more often than not may nasasakripisyo ka, e. May isa na napapabayaan. So, dapat mas maalaga. Doble ang effort. So, ganun na lang kesa wala."
BETTY LA FEA. Dahil sa sunud-sunod na success ni John Lloyd this year, marami ang umaasang magiging Number One din ang bagong teleserye nila ni Bea Alonzo sa ABS-CBN, I Love Betty La Fea, na magsisimula na sa September 8.
"Ewan ko lang. Kagaya ng ano, kahit na anong project na lumalabas, hindi naman tayo nag-e-aim na maging head, e. Ang gusto lang namin na maibigay, yung mapagdaanan muna yung project bago ka umasa na maging Number One or maging box-office. Kumbaga, nandun ang focus namin. Nandun ang focus na pagandahin muna. Ngayon, kung medyo confident ka na sa maibibigay mo, then you hope na sana po tangkilikin."
Napilitan lang ba siya na tanggapin ang role na Armando sa I Love Betty La Fea?
"Ay, hindi. Sino ba ang tatanggi sa ganito kalaking project?
"Ang daming pangalan na sumulpot dito, e. May Gabby Concepcion, may Diether Ocampo; of course, may Jake Cuenca. May Sam Milby pa. Pero ano, e, kung ano yung dumating sa ‘yo, siyempre trabaho ‘yan, gagawin mo. Pero ito yung mga tipo na gusto mo talagang magawa kasi hindi naman...sa tingin mo sa generation namin, makakagawa kami ng Betty La Fea?
"Kumbaga, somehow this will go down in history, e. So, siyempre gusto mong mapasama. Gusto mong hindi ka lang basta napasama, ang laki pa ng role mo. So, I couldn't be happier."
Kabilang din sa mga dahilan kung bakit gusto niya talaga ang proyektong Betty La Fea ay bilang suporta sa kanyang leading lady na si Bea Alonzo.
"Hindi kasi, maraming nagkukuwestyon noon na parang bakit ka pumayag? Eight years kaming magkasama, nagtulungan kami. May mga naibigay ako sa kanya at siya, may naibigay sa akin na hindi ko maaaring naibigay sa kanya along the process. Kumbaga, ngayon nagkakaroon ka ng pagkakataon, gusto mong magbalik doon sa tao. ‘Eto kulang pa ‘to. Kulang pa itong isang show. Yun lang.
"Pagbabalik lang kay Bea. Kasi ganun naman ‘yon, e. Kumbaga, nagtulungan kami. Tinulungan niya ako. Itong Betty La Fea na ito, parang isang project lang ito at hindi pa...kung anumang tulong ang magawa kong tulong dito, sa show niya na ‘to, kulang pa ‘yan."
So, kinu-consider niya na show ito ni Bea at hindi sa kanilang dalawa?
"Oo, ito, show niya talaga. Walang kaso sa akin yun. Ako naman kasi nagagawa ko pa rin ang gusto kong gawin, lalo na sa pelikula. Mas malawak ang option ko sa pelikula. Ito, sustaining namin and kasama siya, and I don't mind kung siya ang bida dito."
BILLION-PESO MAN. Ano naman ang feeling na tinawag siyang "Billion-Peso Man"?
"Alam mo, nagkataon lang na ako ang napiling endorser, pero ang ugat naman nito yung campaign na ‘Ingat,' e. Sobrang lakas nung ‘Ingat' campaign, nung impact noon. Sa tingin ko, kahit na sinong ilagay mong endorser, naku...papatok!
"Ang laki ng naging papel nung campaign, e. Yung ‘Ingat' campaign. Nakatulong ng konti ang pangalan ko, konti lang. Pero hindi, ‘no. I'm happy na umabot nga nung lumabas yung campaign namin, nag-skyrocket daw yung sales. To a point na umabot siya ng P1 billion worth."
Ano ang mas feel niya na title, Box-Office King, Billion Peso Man o Multi-Awarded Actor?
"Ang gusto ko yung ano, Star of the Night," biro ni John Lloyd.
"Mahirap po kasi yung may mga title, e. Masarap pakinggan yung may mga title, pero kumbaga, e, title lang yun. Kasabay noon ay mabibigat na expectations. Kagaya noon, may title ka nga na ganyan, wala ka namang pinupuntahan."
EXCITED TO DO THE SECOND. Excited na ba siya sa second movie nila ni Sarah?
"Excited ako kasi galing kami sa napalaking success nung A Very Special Love. So, may mga tao na parang siyempre nabitin, so, parang gusto mo pang bigyan. Kami in a way, parang nabitin din kami. Parang gusto pa rin, kami."
Masasabi ba niya na nabitin siya kay Sarah?
"Hindi...he-he-he. Sa pelikula."
Sa second movie ba nila ni Sarah may kissing scene na sila at hindi na siya magnanakaw ng halik?
"E, na kay Tita Divine [Sarah's mom] yun. Wala na sa aking mga kamay ‘yan."
Nag-uusap pa ba sila ni Sarah after the movie?
"Oo, nagkikita kami sa ASAP '08 every Sunday."
Napag-usapan na ba nila ang tungkol sa follow-up movie ng A Very Special Love?
"Oo, pero siyempre, hindi na kagaya nung dati. Kasi dati, halos araw-araw magkasama kami. ‘Tsaka talagang magkalapit kami. Lagi kaming nagkikita sa set, sa mga standby areas, sa dressing room. Ngayon kasi sa ASAP kahit nagkikita kami, walang masyadong time na makipagkwentuhan, kasi si Sarah mismo, gusto niyang mag-focus sa ASAP, e. Kasi hindi biro yung ginagawa niya sa ASAP. Ilang numbers siya doon."
NOT YET. Personally, gusto rin ba niyang magkaroon sila ulit agad ng movie ni Sarah?
"Hindi. Kasi, yun nga sinabi ko, parang, kasi nakakatakot na ‘pag naging successful pa, nakakatakot na yung pressure na kung hindi mo mapantayan, dapat lampasan mo. E, parang...di ba bihira sa mga sequel yung mapantayan o malampasan yung part one. ‘Tsaka parang tinodo mo na yung kilig, ano pa ang maibibigay namin?
"So, sana, nakakatakot lang. Pero kung ako talaga ang papipiliin, huwag na muna. Iwan muna natin doon sa ganun kataas. Pero hayaan mo muna na makagawa kami ng ibang pelikula na iba ang kapartner tapos kami ulit. Pero siyempre kagaya ng kahit na anong successful na movie, kailangan mong sundan. So, ayun," tapos ni John Lloyd.