Bongga si Michelle Madrigal. Hindi siya pumili between Killer Question at Killer Task nang humarap siya sa "Central Jury" ng Showbiz Central kahapon, August 31. Instead, sinagot niya ang Killer Question at ginawa rin niya ang Killer Task.
Pero bago 'yon, in-interview muna si Michelle ng "Central Jury" hosts na sina Rufa Mae Quinto at DJ Mo Twister.
Inintriga agad ng dalawang hosts si Michelle nang tanungin kung nagbatian daw ba sila ni Pauleen Luna, na guest naman sa "Don't Lie To Me" portion ni John "Sweet" Lapus that same afternoon. Nakita na raw kasi nina Rufa Mae at DJ Mo si Pauleen na nasa backstage na, bago pa sumalang sa "Central Jury" si Michelle. Nilinaw rin ng dalawang hosts kay Michelle kung si JC de Vera ba ang dahilan ng away nila ni Pauleen.
"No, hindi kami nagpansinan," nakangiting sagot ni Michelle. "Hindi si JC ang dahilan ng pag-aaway namin. Ayoko na sanang ungkatin pa, pero para sa ikalilinaw ng lahat, naunang naging girlfriend ni JC si Pauleen bago naging kami ni JC. Ang pinag-awayan namin, iyong pinagbintangan niya [Pauleen] akong tumatawag daw ako kay JC noong sila pang dalawa. Pero hayaan na natin 'yon."
Si Yasmien [Kurdi], nagbabatian ba sila, hindi ba siya nagseselos na ito ang laging ka-love team ni JC?
"Si Yas, hindi man kami best of friends, pero friend ko siya at nagbabatian kami kapag nagkikita. Wala akong pagseselos sa kanya, 'tsaka matagal na rin kaming wala ni JC. Friends na lang talaga kami ngayon," paliwanag ni Michelle.
Gusto pala siyang alisin ng manager niyang si Annabelle Rama sa Dyesebel dahil gusto raw siyang ilayo kay Marco Alcaraz na kasama niya sa show, pero hindi raw pumayag si Michelle.
"Hindi totoo 'yon, hindi naman nanligaw sa akin si Marco. Masaya lang kaming magkakasama sa pagte-taping ng Dyesebel," ani Michelle.
Ang alam ng PEP (Philippine Entertainment Portal) noon pa, mula na rin kay Annabelle, gusto raw sana niyang ipapatay ang character ni Michelle sa Dyesebel, dahil gusto niyang ilipat ito sa Codename: Asero ni Richard Gutierrez sa GMA-7. Pero hindi pumayag si Michelle at sinabi niya sa kanyang manager na type niyang gumanap na sirena, at saka naghirap na rin siya sa pagte-training noon, with Marian Rivera, ng paglangoy ng isang sirena.
Nagagalit na raw sa kanya ang mga fans nina Dingdong Dantes at Marian dahil sa halik siya nang halik kay Dingdong sa mga eksena nila sa Dyesebel.
"Huwag sana kayong magalit dahil work lang 'yon," nakangiting sagot ni Michelle. "So far, wala pa naman akong nai-encounter na mga fans na nagagalit sa akin o may violent reactions sa akin kapag nakikita nila ako."
Sa rate daw na 1 to 10, 8 ang rating niya kay Dingdong na isa sa 25 Sexiest Men of the World, according to E! Entertainment Television.
Matapos parehong basahin ni Michelle ang Killer Question at Killer Task, minabuti na nga niyang sagutin at gawin na pareho ang mga ito.
Ang Killer Question, totoo ba na lagi raw silang nag-aaway ng mommy niya, ang dating sexy actress na si Karla Kahlua, at dumating 'yon sa punto na sinugod daw siya ng mommy niya at pinalayas pa sa kanilang bahay.
"Not true," sagot ni Michelle. "Open book naman na madalas talaga kaming hindi nagkakasundo ng mommy ko, pero hindi pa naman 'yon dumating sa puntong nagkatulakan at nagsabunutan kami. Magkasama kami ng sister kong si Ehra [Madrigal] sa bahay at ngayon, magkasundo na kami palagi ng mommy ko."
Sa Killer Task naman, pinasagot si Michelle sa intriga na may gap daw sila ni Bianca King, na supposedly ay siyang kontrabida sa buhay ni Dyesebel, pero bakit si Michelle ang lumalabas ngayong main kontrabida?
"No, walang ganoong intriga. Wala kaming gap ni Bianca, she's a good friend. At saka nang magsimula kaming mag-taping ng Dyesebel, written na ang character ko as Berbola, isang sirenang magkakaroon ng paa at gagawin ang lahat para maagaw si Fredo [Dingdong] kay Dyesebel. Saka sa story, na-comatose si Betty [Bianca] kaya hindi muna napanood ang character niya, kaya ako muna ang naging kontrabida sa buhay nina Dyesebel at Fredo," paliwanag ni Michelle.
Doon naman pumasok ang phone patch kay Bianca at nagbatian pa ang magkaibigan. Barkada kasi sila ng kambal na Richard at Raymond Gutierrez at si Bubbles Paraiso, na isa rin sa talent ni Annabelle.
"Wala kaming gap ni Michelle dahil sa role," sabi ni Bianca. "Saka paano kami magkakaroon ng gap, hindi nga kami nagkakasama sa taping dahil hindi magtatagpo ang mga characters namin. Kung magkakaroon man, it will be a healthy competition.
"But, sad to say, wala talaga dahil kapag wala na ang character niya as Berbola, saka naman babalik si Betty. Kaya humanda na sa akin sina Dyesebel at Fredo, abangan ninyo ang pagbabalik ko dahil pahihirapan ko sila talaga," natatawang patapos ni Bianca sa telepono.
Nagpasalamat sina Rufa Mae at Mo kay Michelle sa pagiging professional at pagpapakatotoo nito sa pagsagot sa Killer Question at Killer Task.