Ikinagulat ng marami noong lumabas ang pangalan ni Rayver Cruz, na siyang sinasabi daw na crush ni Sarah Geronimo na taga-ASAP. Agad ding lumabas ang pangalan ni Melissa Ricks, na siya naman daw tunay na karelasyon ng young actor.
Kataka-taka ito dahil ni minsan ay walang nabalita na nakitang nagde-date o may espesyal na napapansin sa dalawang young stars. Kaya nga naging palaisipan kung bakit may mga nagsasabi na may espesyal na namamagitan sa dalawa na pilit lang daw itinatago ng mga ito.
Sa interview ng PEP (Philippine Entertainment Portal) kay Melissa tungkol sa isyu ay nagkuwento ang young actress na may mga negative messages nga raw siyang natatanggap sa kanyang blog.
"Bago pa man lumabas ang mga balita na ‘yan, may mga fans nang umaaway sa akin. Nagagalit sila and sinasabi nila na layuan ko raw si Rayver dahil hindi raw kami bagay, pinapadala nila ito sa blog ko.
"'Tapos nga, I read an article na sinasabing nagkaaway raw kami ni Rayver because of Sarah [Geronimo]. May nabasa pa uli ako na magkaaway raw kami ni Rayver, at tinext ko pa raw si Gerald [Anderson] dahil may rehearsal kami sa ASAP at magkasama sila ni Rayver.
"Kung babasahin mo, maniniwala ka dahil kumpleto yung
mga detalye. Hahanapin ko yung source niyan kasi yung mga detalye niya, totoo.
Yung mga kaganapan lang ang hindi. Sabi pa nga ng sumulat, abangan daw sa ASAP kung
mag-iisnaban daw uli kami ni Rayver."
Aminado si Melissa na dahil magkakaedad sila nina Rayver, Kim Chiu, Gerald, at Matt Evans ay talagang malapit sila sa isa't isa. Pero kung closeness daw with Rayver, hindi naman daw sila yung tipong "close na close."
"Magkakasama kami sa ASAP kasi kami ang magkakaedad,
lagi kaming magkakausap, kami ang magkakasama sa mga [production] numbers. 'Tapos
meron din akong number ni Rayver, pero hindi kami textmate. Very charming si Rayver, mabait at kaibigan ko talaga siya,
pero ganun lang."
THIS MUST HAVE STARTED IT. Nang tanungin ng PEP kung may naiisip ba siyang isang insidente na puwedeng pagbasehan ng paghihinala ng iba na may special something nga sila ni Rayver, may naalala si Melissa
"Never kaming lumabas ni Rayver na kami lang," sabi ni Melissa. "Pero one time, mayroon kaming pinuntahan na party ng producer ng isang show and hindi ko alam na nandun pala si Rayver. Tumawag sa akin yung isang friend namin, ‘Uy, nandito si Rayver, pumunta ka na raw dito dahil wala siyang kasama.'
"Pagdating ko dun, nagkasama-sama kami sa isang table—ako, yung producer, yung RM [road manager] ko sa Star Magic, yung P.A. [production assistant] ko—‘tapos inaasar nila kami. Pero ganun lang.
"Nung uuwi na ako sinabihan ko si Rayver na sabay na lang kaming umalis kasi nga nahihiya akong umalis na mag-isa, inasar na kami. Bakit daw kami sabay na uuwi? Ito lang ang naisip ko na incident na puwedeng pagsimulan ng lahat," lahad ng young actress.
Kahit na ipinareha na kay Matt Evans, consistent pa rin si Melissa na magkaibigan lang talaga sila ng ka-love team.
"Ganun pa rin kami, asaran lang, kulitan, mag-aaway,
magbabati. Pero siyempre as time goes on, mas nagiging close. Hindi natin
masasabi ang mangyayari in the future, but as of now, we're friends."
STRICTLY TAKE 1. Medyo matured ang role ni Melissa as Sophia sa Iisa Pa Lamang. Kinakitaan nga siya dito ng husay sa pagganap. Ayon naman kay Melissa, hanga't maari ay gusto niyang "take 1" lang ang mga eksenang kasama siya dahil sa hiya niya sa husay ng mga kasama sa nasabing teleserye.
"I enjoy the taping. Take 1 lang kami dun. Bawal umulit. Siyempre ang gagaling ng mga kaeksena mo. ‘Pag nag-‘take 3' or ‘take 4' ka, nakakahiya.
"Dumarating yung script, umaga na. So, umaga na namin
binabasa, kailangan tutok ka. ‘Pag wala kang ginagawa, kailangan basahin mo
yung script mo at pag-aralan. Nakakahiya kasi kina Ms. Pie [Cherry Pie
Picache], kina Ate Claudine [Barretto]... Alam nila ang lines nila, alam nila ang gagawin
nila, kaya kailangan handa ka rin sa eksena mo."
Bago magtapos ang interview ng PEP sa kanya ay kinumpirma ni Melissa na isang proyekto ang hinahanda ng ABS-CBN na pagsasamahan nila nina Gerald, Kim, at Matt.