"Again, I'm very thankful that ABS is very accommodating and very understanding when it comes to reviewing the contract. Kumbaga, they gave me time na hinihingi ko. Binigyan nila ako ng time to process everything and I really appreciate it," says Judy Ann Santos.

Photo: Noel Orsal

Sa wakas ay pumirma na ng three-year exclusive contract sa ABS-CBN ang young superstar na si Judy Ann Santos kahapon, November 6. Ginanap ang contract signing sa Bohol Room sa 14th floor ng ABS-CBN.

Kasamang pumirma ng kontrata ni Juday ang kanyang manager na si Alfie Lorenzo. Present naman sa hanay ng ABS-CBN executives sina Ms. Charo Santos-Concio, president; Ms. Cory Vidanes, SVP for TV production; Mr. Enrico Santos, business unit head; at Mr. Ron Valdueza, VP for finance

Naging maintriga at masalimuot ang mga nangyari bago ang pagpirma ng panibagong kontrata ni Juday sa ABS-CBN. Matatandaan na naging malaking isyu ang samaan ng loob nila ng kanyang manager pagkatapos kumonsulta ni Juday sa abogado bago siya pumirma ng kontrata. (CLICK here to read related story.)

Pero ang lahat ng ito ay bahagi na lamang ng nakaraan dahil nagkaayos na nga sina Juday at Alfie. At kahapon ay pumirma na nga ang aktres ng panibagong kontrata sa Kapamilya network.

HIRING A LAWYER. Pagkatapos ng contract signing ay nakausap ng PEP (Philippine Entertainment Portal) si Juday.

Inamin niya na natuloy pa rin ang pagkonsulta niya sa lawyers. Isa-isa niyang ibinigay ang mga rason kung bakit medyo natagalan ang kanyang pagpirma ng kontrata sa ABS-CBN.

"Una, kasi nag-isip pa ako," umpisa ni Juday. "Pangalawa, kailangan kong intindihin na mabuti. Pangatlo, kailangang i-draft ng mga lawyer yung mga napag-usapan naming kontrata at yung napag-usapan naming mga nilalaman ng kontrata. The lawyers had to meet the representative of ABS to negotiate. Tapos nagbakasyon, nagkaroon ng Undas [All Saints Day], at nagkataon din na busy lang din ako kaya di nagkaswak-swak ang schedule.

"This is my first time to get lawyers, maging sa mga endorsements ko, nagkonsulta na rin ako sa lawyer ko. Kumbaga, I hired a lawyer already with all the contracts na pinag-uusapan. Alam ko na wala akong babaliing clause at ang mga lawyers ko na ang magsasabi kung ano ang mga bagay na dapat kong gawin at puwede kong gawin, at ang mga hindi."

BIR PROBLEM. Aminado si Juday na ang hindi matapos-tapos na kaso niya sa Bureau of Internal Revenue (BIR) ang isa sa malaking dahilan kung bakit siya kumuha ng abugado para sa mga kontratang pinipirmahan o transakyong pinapasukan.

"Oo naman, hindi ko naman itinatanggi," sabi ng aktres. "Kasi siguro, kung naging maingat ako nung kabataan ko sa mga kontrata ko, baka wala akong napasukan na ganito kalaking problema ngayon. Hindi lang kasi nakaka-hassle, hindi lang naman ako ang naha-hassle. Ang pamilya ko, unang-una na si Mommy, nandiyan pa si Yohan [Juday's adoptive daughter].

"Ang hirap pagsabayin ang mga bagay-bagay na isa ka lang at kailangang alam mo lahat ng tinatapakan mo. Kasi kapag nalugmok ka, at the end of the day, ikaw na lang, wala nang tutulong sa iyo. Ikaw at ikaw pa rin ang haharap sa problema mo. Ako, kailangang maging matibay na lang ako kasi may anak ako, hindi ako puwedeng magpakita na hindi ko kaya.

"Hindi pa rin siya natatapos," patuloy niya. "Ipinagdarasal ko na lang na kung anuman ang maging desisyon, kayanin ko na lang sana. Ako naman, hindi ako tumitigil sa kadadasal. Kasi siyempre, lahat naman ng may kaso, gusto matapos na lang kasi masakit sa ulo, masakit sa dibdib. Hindi ka makatulog nang maayos, every once in a while, natutulala ka because naiisip mo na may kaso ka nga pala. 

"Ang sa akin lang, anu't anuman ang maging desisyon, ipinapangako ko naman na wala akong tatakbuhan na responsibilidad. Mapa-mali man ako o tama, kung anuman ang desisyon na ibibigay sa akin, haharapin ko naman."

THE NEW CONTRACT. Noong kasagsagan ng samaan nila ng loob nina Juday at Alfie, nagsalita ang talent manager na ang kontratang hiningi niya sa ABS-CBN ay isang secured contract para sa alaga. Anuman daw ang mangyari sa tatakbuhin ng tatlong taon, ke mag-asawa o mabuntis man si Juday, ay siguradong may trabaho ito at may papasok na pera.

"Kasama ‘yan sa security," pagsang-ayon ni Juday. "Ayoko lang na dumating yung time na sumbatan na, ‘Wala, di mo kasi nilagay, e, alam mo naman na mangyayari sa buhay. E, nakaplano ka na nga!' Yung ganun.