November 5, pumirma na sa Star Cinema for a one-picture contract si Maricel Soriano. Kasama ni Maricel noong pumirma ng kontrata ang kanyang manager na si Wyngard Tracy at kaharap ang managing director ng Star Cinema na si Malou Santos.
Kaugnay ng pagpirma ni Maricel sa movie arm ng ABS-CBN ay ang paggawa niya ng pelikulang muli nilang pinagsamahan ni Direktor Chito Roño. Si Direk Chito ang direktor ng Dahas, ang pelikulang nagpanalo kay Marya ng Best Actress award mula sa Famas noong 1995.
T-2 ang titulo ng pelikulang muling pinagsasamahan nina Maricel at Direk Chito. Isang horror-movie, ani Maricel, na kakaiba sa ibang horror movies dahil may puso, nakaka-inspire at nakakaiyak.
Sa muling pakikipagtrabaho ni Maricel kay Direk Chito, may mga bagay daw siyang napansin na hindi nagbabago sa mahusay na direktor mula noong huli nilang pagsasama 13 years ago. Tulad ng paggamit ng memo pad for communication at ang appetite nito sa pagkain.
"Gustung-gusto niyang kumain, sasabihan ko siya, ‘Bawal kasi lumalaki na ang tiyan mo.' Magrereklamo sa akin yun, ‘Alam mo Marya, kanina pa ako gutom na gutom.' ‘Tapos magagalit siya pag di ako kumakain, e, kumain na naman ako, pinipilit pa rin niya ako," kuwento ni Maricel nang makausap ng PEP (Philippine Entertainment Portal).
Masaya raw talagang katrabaho si Direk Chito.
"Masaya
kami at excited kami pareho. Umuuwi kaming umaga na kasi horror yung movie
namin, pero kahit pagod, masaya ako. Sabi ko nga kay Wyngard, ‘Alam mo,
Wyn, ngayon ako umuuwi na kahit pagod, happy ako.' May ngiti ako sa labi
bago ako matulog."
Ani Marya, may mga pelikula siyang ginawa dahil kailangan lang niyang gawin, pero ang T-2 ay isang pelikula na bukod sa kailangan niyang gawin ay gusto niya.
"Nag-uusap kami palagi ni Wyngard, masarap gumawa ng pelikula na gusto mo ring gawin. Dumaan tayo sa aspeto ng buhay natin na kailangan lang nating gaiwn, di ba? Ang T-2, aside na kailangan ko itong gawin, gusto ko siyang gawin kasi inspired ka."
Hiningan naman ng pahayag ng PEP si Marya hinggil sa dating member ng cast na si Baron Geisler. Balitang pinanghinayangan at iniyakan ni Baron ang pagkakaalis sa T-2 dahil nagkaroon ng miscommunication at problema sa scheduling. Naiwan kasi sa Venice, Italy, si Baron for the indie movie Jay.
"Si Direk Chito na lang ang tanungin ninyo tungkol diyan. Mahusay si Baron, nakita ko yun sa Vietnam Rose. Actually, mahuhusay silang lahat because dedicated sila sa trabaho.
"Alam mo napaka-blessed ko. Lagi kong masasabi yun dahil halos lahat ng nakakatrabaho ko, nakikita ko pag nasa set, talagang mahal nila ang trabaho nila. Wala akong masasabi, lahat sila."