Masaya si Hero Angeles dahil nabigyan na naman siya ng project ng GMA-7 pagkatapos ng Dyesebel. Ito ay ang bagong telefantasya Kapuso network, Luna Mystika, kung saan ginagampanan niya ang isang engkanto.
"Ako po si Alguwas dito, ang pinuno ng masasamang engkanto," paglalarawan ni Hero sa kanyang role nang makausap siya ng PEP sa presscon ng Luna Mystika kagabi, November 11, na ginanap sa Studio 5 (dating Studio 3) ng GMA Network Center.
Bakit siya pumayag na gumanap bilang kontrabida?
"Actually, nag-e-enjoy ako sa pagganap ng kontrabida, e," sagot ni Hero. "Yung sa Dyesebel, kontrabida ako sa love team nina Aljur [Abrenica] at Kris [Bernal]. First time ko kasing mabigyan ng ganung role. Kasi dati ang role ko, sa love team, teeny-bopper role. So, bago siya para sa akin. Dito kasi sa GMA, wala akong ka-loveteam, so ibang atake dapat."
Kasama pa rin ni Hero sa Luna Mystika sina Aljur at Kris.
Mas gusto ba niya na walang ka-love team?
"Sa ngayon, masaya ako kasi parang ine-explore ko muna yung capabilities ko bilang artista na wala akong ka-love team. Pero if ever naman na mabigyan, iga-grab ko pa rin," saad ng batang aktor.
STAR CIRCLE QUEST BATCHMATES. Mas gusto niya bang ka-love team yung hindi na foreigner? Si Sandara Park kasi na dati niyang ka-love team sa ABS-CBN ay isang Koreana.
"Mas gusto ko Pinoy naman, para hindi na aalis!" biro ni Hero.
Magka-batch sina Hero at Sandara sa kauna-unahang Star Circle Quest, ang reality-based artista search ng ABS-CBN, kung saan si Hero ang itinanghal na Grand Questor at si Sandara naman ang kanyang naging runner-up.
Si Hero ay nakabalik na sa showbiz, pero ang ka-love team niyang si Sandara Park, sinubukang bumalik pero walang nangyari. Dahil dito, nagdesisyon si Sandara na bumalik na lang ng South Korea upang doon hanapin ang kanyang kapalaran.
Ano ang masasabi ni Hero rito?
"Feeling ko naman, may reason," sagot niya. "Actually, last time nag-text sa akin si Melissa [Ricks, batchmate nila sa SCQ], sabi niya, ‘I'm with Sandy.' Gusto raw niyang magkita-kita yung batch namin. Sabi ko, ‘Wow, talaga bumalik siya?' Sabi ni Melissa, for a vacation lang daw. Makikipag-meet siya that evening kay Sandy. Pero sabi ko, hindi ako puwede kasi may taping ako ng Walang Tulugan. Saturday kasi that time. Tapos sabi niya, ‘Okay, sige sabihin ko na lang.' Tapos after nun, wala na akong balita."
Sa mga ka-batch niya sa Star Circle Quest, sino pa sa kanila ang nakakausap ni Hero?
"Si Melissa, si Neri [Naig], tapos si Joseph [Bitangcol]," banggit ni Hero. "Si Joseph yung mas madalas kong ka-text, pero hindi kami nagkikita nang madalas kahit pareho na kaming nandito sa GMA. Minsan nagkikita lang kami sa Walang Tulugan."
