Last year ay napulaan ang Metro Manila Development Authority (MMDA), na pinamumunuan ni Chairman Bayani Fernando, sa naging takbo ng Metro Manila Festival Awards night. Sa halip kasi na bigyan ng importansiya ang mga nanalo sa awards, kabilang si Sen. Jinggoy Estrada na nagwaging Best Actor para sa Katas ng Saudi, mas binigyang pansin ng MMDA at ng mga producers ng awards night ang special concert ni Lani Misalucha na naganap right after the awards presentation.
Sa palagay ng mga artista at mga nanalo, pati mga showbiz observers, binastos ng MMDA ang mga artista dahil hindi sa mga winners nabaling ang focus ng tao. Mas pinili kasi ng MMDA na bigyan ng atensiyon ang concert ni Lani dahil fund-raising event ito ng MMDA para makalikom ng pondo para sa filmfest beneficiaries.
Sa presscon cum victory party ni Chairman Bayani na ginanap sa Annabel's resto kahapon ng tanghali, November 17, bilang pasasalamat sa panalo niya sa Celebrity Duets Season 2, tinanong ng PEP si Chairman kung parehong format ba ang masasaksihan ng mga tao sa awards night ng MMFF. May concert ba muli sa halip na ang focus ay ang awards winners?
"Ganoon pa rin ang format. Nag-meeting na ang festival committee last week at nagdesisyon kami na ganoon pa rin ang aming gagawin. We are going to have a concert," pahayag ng controversial MMDA Chairman, na siyang punong abala sa MMFF.
Dagdag niya, "You know, we are spending so much for the awards night. The objective of the MMFF is to earn money for its beneficiary, which is actually the movie industry. So kami, doon kami sa hanggang kikita ng pera.
"Wala kami doon sa art. Pagdating sa art, we leave it up to the beneficiaries [film industry] for the artistic aspect of the festival. Our concern is to earn money for the beneficiaries. Kaya ang awards night ganoon ang nangyari, kasi wala kaming pagkukunan ng pera for the awards. Kaya we thought of coming up with a concert as part of the awards night. We will only improve on it, but there will still be a concert."
Sa opinyon ni BF, ang pagdating ng stars sa Red Carpet ay mas importante kesa ang awards proper mismo. Kaya naman daw iniba nila ang format ng awards at hindi na ang nakasanayan natin na may malalaking stars na nagsisilbing awards presenters.
"We want the winners to be all alone in the stage and not share the limelight with anyone. He will be alone onstage and the focus will be on him. There will be no other star to share with him that moment. That's the idea. All eyes would be on him as he gets his trophy and does his acceptance speech. This is a different concept. We should not always follow what is normally done," sabi ng Celebrity Duets Season 2 grand champion.
Ayon pa kay BF, dapat sarili ng winner ang limelight pagtanggap niya ng award. Kaya naman babanggitin lang muli ang pangalan ng nominees. Pagtawag sa winner, solo siyang papanhik ng stage para kunin ang kanyang trophy at i-deliver ang kanyang acceptance speech.
"Pag ang nag-abot sa kanya ng premyo ay mas bigger star than him, matatabunan lang siya. Kaya iniba namin ang format to give the winners more importance," paliwanag niya.
Tungkol naman sa panalo niya sa Celebrity Duets 2, hindi raw niya inaasahan na siya ang mananalo dahil hindi naman daw niya alam kung saan manggagaling ang mga boto. Kahit na marami ang nag-predict na siya ang mananalo, hindi pa rin daw siya confident na siya ang magwawagi.