Ipinarating namin kay Marian Rivera na tuwang-tuwa si Vivian Velez na siya ang gaganap ng title role sa TV remake ng Ang Babaeng Hinugot sa Aking Tadyang. Vivian produced and even took the female lead in this Carlo J. Caparas' masterpiece that was shown back in 1981.
Nasabi nga rin ni Vivian na posibleng matalbugan pa siya ni Marian sa pagganap bilang si Proserfina, ang heroine ng nasabing komiks material na mula sa pagsasapelikula nito, after so many years, ay mapapanood na muli sa TV.
"Basta, ang original ay original pa rin!" sabi pa ni Marian. "Naku, nakatutuwa naman si Miss Vivian! Salamat na lang sa kanya. Pero, siya talaga ang original at hindi ko mapapantayan yun.
"Nasabi lang niya na mahihigitan ko siya, kasi, natutuwa lang siya sa akin. Pero, mahirap yatang mahigitan si Miss Vivian doon. Napapanood lang siguro kasi niya ako, at hindi niya sinasabi yun para ma-pressure ako," dugtong pa ng dalaga.
Sa totoo lang, as we write this, wala pang idea si Marian kung ano ang magiging role niya sa follow-up sa very succesful teleseryes na tinampukan niya sa GMA-7, ang Marimar at Dyesebel.
PLAYING NIEVES. May mga gumagawa naman ng isyu tungkol sa pagtanggap niya ng role na para sana kay Eugene Domingo sa Shake, Ratlle & Roll X.
"Kahit siguro ako pa ang twentieth choice, kung gusto ko ang role, kung ako ang matutuloy para roon, palagay ko, para sa akin talaga yun.
"Palagay ko, wala naman ding problema kay Uge [Eugene]. Masaya ako sa role at sa episode ng pelikula entitled ‘Nieves.' Ako nga si Nieves, and it's a good role, at tatapusin ko yun, in time for the Metro Manila Film Festival," nangingiting sabi pa ni Marian.
Hindi big deal kay Marian kahit sabihin pang pamasak-butas lang siya kay Uge. Ang mahalaga ay mayroon siyang trabaho.
"Okey rin sa akin ang maging sidekick, walang problema roon. Lalo na kung sidekick ako ng bidang lalaki, para maiba naman. Open ako sa iba't ibang klaseng challenges," dugtong pa ni Marian.
Wala pa talagang masasabing launching movie si Marian, na tipong solo niya, pero nakapagbida na siya.
Kasalukuyang itinatanghal ang One True Love ng GMA Films at kasama niya rito sina Dingdong Dantes at Iza Calzado.
FRIENDS BUT NOT CLOSE. Sa Desperadas 2, isa na naman sa mga bida rito si Marian. Napag-alaman nga ng PEP (Philippine Entertainment Portal) na kahit daw paano ay nakakapag-open up na ng kanyang mga problema si Marian sa kanyang co-stars, particularly kay Rufa Mae Quinto. But she vehemently denies this.
"Nakikipag-usap na ako, nakikipag-bonding, but not to the extent na nagsasabi na ako sa kanila ng mga problema.
"Natural lang naman na noong una, medyo ilang ako, kasi sila, mga datihan na. Matagal na silang magkakasama. Bago lang ako sa grupo.
"Totoong tao kasi ako na kung hindi ko pa masyadong gamay yung tao, hindi ako basta makikipag-chikahan na parang close na close na. Hindi ako ganyan.
"But, since pangalawang pelikula na naming magkakasama yung Desperadas 2, siyempre, nakapag-build na ako ng rapport sa kanila. Pero, it's not true na nagsasabi na ako ng mga problema.
"Kumustahan lang, chikahan. Wala rin akong problema sa ngayon. Hindi ako basta nagsasabi ng problema, kasi, kaya ko namang i-solve na mag-isa ang mga problema ko.
"Kung hindi ko kayang i-solve, sa family ko na muna io-open yun, at hindi sa mga kapwa ko artista.
"Mahirap sabihin na may ka-close talaga ako. 'Pag ganoon kasi, dapat, lagi mong kasama. Magkausap kayo palagi, magka-text.
"Kung may super-duper-close ako, si Paolo Ballesteros yun, si Lotlot de Leon, kasi, sa Dyesebel noon, araw-araw halos, kasama ko sila.
"Sina Manilyn Reyes, Ate Rita [Avila], Tita Perla [Bautista], sila yung masasabi kong ka-close ko. Hindi ko sinasabing hindi ako close kay Rufa Mae, pero kaibigan ko siya," tuluy-tuloy na sabi ni Marian.