Kaunti lang ang mga artistang babae na in the prime of their career, made a decision to concentrate on family life. Isa na rito ang premyadong aktres na si Maricel Laxa. Pero nagbabalik-pelikula ngayon si Maricel sa pamamagitan ng Magkaibigan, official entry sa 2008 Metro Manila Film Festival.
Inalam ng PEP (Philippine Entertainment Portal) kay Maricel kung ano ang reaksiyon ng mister niyang si Anthony Pangilinan sa pagtanggap niya ulit na gumawa ng pelikula.
"Sabi niya, ‘Well, it's about time!' Supportive naman siya. Hinihintay lang niya na gumawa uli ako ng pelikula. Mapili lang kasi talaga ako. I should say, protective lang talaga ako sa time ko, lalo na sa bahay at sa pamilya ko. I really believe that the children need the time and attention of their parents," pahayag ni Maricel sa PEP (Philippine Entertainment Portal) nang makausap namin siya sa presscon ng Magkaibigan noong November 27.
Number one career para kay Maricel ang kanyang pamilya, at given na agad yun nang lumagay siya sa tahimik.
"Sino ba ang nag-wish na mag-spend ng so much time sa work? Wala naman siguro. I don't want to miss that opportunity, and I want to give the best to my children. Yun talaga ang commitment ko, at saka mapa-realize sa mga anak ko ang importansiya ng kanilang kapaligiran as they grow up," sabi ng aktres.
Sumusulpot-sulpot si Maricel sa TV, pero hindi siya puwede on a regular basis dahil ang problema talaga sa kanya ay time.
"Isa lang akong nilalang, at napakarami kong ginagawa," ani Maricel. "Kung matatali ako sa isang project na kailangang magtrabaho ako until wee hours in the morning for how many days a week, sorry, but I cannot. Kung konting exposures lang siguro, okey na yun."
TEAM-UP WITH DIREK JOEY. Nagbabalik si Maricel sa isang pelikulang idinirek ni Jose Javier Reyes, ang Magkaibigan. Matatandaan ang tindi ng past collaborations nila as actress and director sa mga pelikulang Ikaw ang Lahat sa Akin, Iisa Pa Lamang, at Minsan Lang Magmamahal.
"Lahat ng nagawa namin, award-winning," banggit ni Maricel. "People will still come up to me, natatandaan pa rin nila ang lines ng characters na ginampanan ko sa mga pelikulang 'yan.
"Si Direk ay ninong namin sa kasal. Tinanggap ko ang pelikula just because I received an email from him, and he wants me to be a part of his film. So, what can I say? Makakatanggi ba ako?" tawa niya.
MARRYING A PANGILINAN. Naikukumpara ang naging married life nina Anthony at Maricel kina Senator Francis Pangilinan at Sharon Cuneta. Being married to a Pangilinan, marami ang nagsasabing maiiwasan talaga ang grabeng mga intriga kung ang isa, lalo na ang babae, should project a low profile. Gaya sa sitwasyon ni Maricel, na hindi naman puwedeng mangyari kay Sharon, being the Megastar.
Anong palagay ni Maricel sa puntong ito?
"I can only speak sa aming dalawa ni Anthony," sabi ni Maricel. "We are not defined by what other people say that we are. Kung ano ang sinasabi ng mga tao, hindi kami nagpapadala sa ganoon.
"Kung may sasabihin at alam naming malinis ang konsensiya namin at hindi naman totoo, walang problema, di ba? Ang point namin, we just have to do our work, the best that we can. Pabayaan na lang ang mga intrigang 'yan. So far, wala naman kaming intrigang kung anu-ano.
"Hindi ko alam, kasi gumagawa ako ng pelikula ngayon, pupuwedeng intrigahin uli ako. Naku, e, kung ganoon, ganoon talaga! Ang importante kasi, yung mag-asawa ang nagkakaintindihan," saad ni Maricel.