Magkasabay na hinarap at sinagot nina Kim Chiu at Gerald Anderson sa kanilang live guesting sa The Buzz last Sunday, November 30, ang 10 toughest questions ng The Buzz host na si Kris Aquino sa segment na "Tough Ten."
Tough Question No. 10: "Sinasabi ngayon, kayo na ang susunod sa yapak ng pinakamalalaking stars natin, pero kung kayo ang papipiliin sino ang gusto ninyong sundan?"
Si Kim ang unang pinapili at ang mga pangalang nabanggit para pagpilian niya ay sina Judy Ann Santos, Claudine Barretto, Kristine Hermosa or Bea Alonzo.
"Ako, si Ms. Judy Ann Santos. Kasi kahit sobrang sikat na siya, kahit sobrang malayo na yung narating niya, mabait pa rin siya sa lahat. At saka sobrang down-to-earth daw siya, sabi ng mga tao. So, gusto kong maging ganun."
Si Gerald naman, mga pangalan nina Piolo Pascual, John Lloyd Cruz or Sam Milby ang binanggit for him to choose.
"Siguro si Piolo. Lahat nasa kanya na, e, katawan, guwaping, magaling umarte. He has it all."
Tough Question No. 9: "In your new soap Tayong Dalawa, meron kayong bagong ka-love triangle, si Jake Cuenca. Kung tatanungin kayo ngayon, sa totoong buhay, sino ang itinuturing n'yong ka-love triangle n'yo sa isa't isa?"
Sinundan pa ang tanong na ito ng The Buzz host kay Kim: Sino yung girl na nagtatangkang agawin si Gerald sa kanya?
"Sino ba. Ang dami kasi, e. Siya na muna," palusot muna ni Kim.
"No, kailangan mong sumagot. Name your top three?" pilit ni Kris.
"Sino ba..? Siyempre si Pauleen [Luna]. Si Nina [Jose]. Sino pa ba?"
"Si Nina? Uy, hindi napabalita yun, ha. Uy, marami tayong na-discover," hirit ni Kris. "Hayaan mo, for you, pag nag-guest siya sa Boy & Kris, iirapan ko siya."
At wala nang naibigay na ibang pangalan pa si Kim.
Para kay Gerald naman, sino yung lalaki na feeling niya ay kaagaw niya kay Kim? He was asked to name his top three.
"Siguro si Enchong Dee. Out of all the guys, siguro siya. Pero kaibigan namin siya." At hindi na nagbigay pa ng ibang pangalan si Gerald.
Tough Question No. 8: "Dalawang taon na ang relationship n'yo on and off-screen, ano ang ikino-consider n'yo na pinakamatinding intriga na hinarap n'yo and why?"
Si Gerald ang sumagot, "Siguro sa mga girls. Marami raw kasi akong girls. Yun pa lang."
Tough Question No. 7: "Sa lahat ng nali-link sa bawat isa sa inyo, kanino kayo pinaka-nagselos at bakit?"
"Kanino ba? Nahihiya ako," ani Kim muna.
Pilit pa ring pinasagot ni Kris ang tanong kay Kim. "Kanino talaga parang nabuwisit ka?"
"Siyempre kay Pauleen. Kasi paulit-ulit na lang yung issue na ‘yan. Hindi na natapos. Paulit-ulit kaya ayoko nang sumagot," pagtatapat ni Kim.
Tough Question No. 6: "Kailan n'yo napaiyak ang isa't isa. Ang tanong ko kay Kim, because of the issue na ayaw matapos, napaiyak ka ba?"
"Hindi, nabubuwisit lang," sagot ng teen star.
Bumaling pagkatapos si Kris kay Gerald. "Ikaw, Gerald, sabi niya ayaw matapus-tapos? Baka ikaw yung ayaw tumapos?"
"Hindi, hindi ho," depensa ni Gerald. "Kasi paulit-ulit talaga. Kahit nga nasa abroad kami, pagbalik namin nandiyan pa rin. I don't know."
"Tapos na ba, from your point of view," follow-up ni Kris.
"Oh, yeah! Way, way back then pa, ho. Totoo ‘yan," sagot naman ng binatang Fil-Am.
Tough Question No. 5: "Naging kayo ba talaga? Yung totoo! And you had to break it off kasi daddy mo (turning to Kim) ang humadlang?"
"Hindi siya humadlang. Actually, wala siyang reaction," sagot naman ni Kim.
Pero naging sila ba talaga ni Gerald?
"Hindi, no commitment. No, 'yes' or 'no'... no 'I love you'... wala lahat," dagdag pa ni Kim.
How about Gerald?
"Like what she said. Ewan ko. Wala talaga," sagot naman ni Gerald.
"So, hindi pa kayo nag-a-I love you sa isa't isa ever?" pagkukumpirma ni Kris sa narinig sa dalawa.
"Sa TV," bungisngis na sabi ni Kim.
"Ikaw, Gerald?" baling ni Kris kay Gerald.
"Everyday po... as in everyday."
"Hindi kaya!" protesta ni Kim.
Sa text o in person?
"Wala... ewan ko," pakiyemeng sagot ni Kim.
Hirit ni Kris, "Kanina honest ka sa akin, huwag kang masinungaling ngayon."
"Hindi everyday. Siguro three times a week, ganun," sabi ni Kim.
"Kapag ina-I love you ka, what do you say?" curious na tanong pa rin ni Kris kay Kim.
"Wala. Hindi ko pinapansin."
Kahit 'thank you', wala?
"Wala."
At sumingit na si Gerald, "Anong hindi ka nagte-thank you? Sa thrice a week, twice kang nagte-thank you."
"Bakit ayaw mo pang mag-I love you?" si Kris uli kay Kim
"Ayoko pa, e. Gusto ko ang trabaho ko," may laman namang sagot ni Kim.
Tough Question No. 4: "Nasabi ni Kim na ayaw niya ng commitment para masaya, bakit? Nagiging malungkot ba kapag may commitment?"
"Opo, kasi may away, selos... maraming bawal," katuwiran ni Kim.
"E, normal naman na magselos ka. I'm sure nag-aaway din kayo?" si Kris uli.
"Hindi, kasi hindi naman kami nag-aaway."
Do you realize na ikaw ang lugi by not committing?
"Hindi, hindi ako lugi," sagot ni Kim.
Pagbibigay-halimbawa naman ni Kris kay Kim, kung wala raw commitment, may right si Gerald to date around at walang karapatan si Kim na manabunot ng ibang girls dahil love team nga lang sila't walang commitment.
"Ay, ayokong manabunot! Siguro iiyak na lang ako," katuwiran na lang uli ni Kim.
"Ikaw, Gerald, you want a commitment? The truth?" baling ni Kris kay Gerald.
"Of course... of course," sagot naman ni Gerald.
"Sinasabi mo sa kanya, ‘Kim, maging tayo na.'"
"Alam po niya. She knows," sagot uli ni Gerald kay Kris.
Comment tuloy ni Kris kay Kim, "Ang haba ng hair nito. Ayaw pa."
Tough Question No. 3: "Kim, kaya ba ayaw mo dahil sa tingin mo, babaero si Gerald?"
"Lahat kasi ng lalaki na nakikilala ko ay babaero." Napangiti si Gerald sa sinabing ito ni Kim.
Kaya ba may pag-aalala kay Kim na baka si Gerald ay isa ring babaero?
"Gitna. Slight yes, slight no," alanganing sagot ni Kim.
"'Yes', because of mga tsismis, 'no' dahil sa pagkakakilala mo?" pagtatanong pa ni Kris sa Filipino-Chinese Cebuana.
"Sa pagkakakilala ko, hindi siya babaero. Di ba kapag babaero, maraming girls, maraming... magimik, ganyan? Hindi naman siya ganun, e." pagtutuwid naman ni Kim tungkol sa kanyang ka-love team.
Tough Question No. 2: "In a scale of one to 10, with 10 being the highest, how much do you love each other?"
Si Gerald muna ang sumagot: "Sa akin 8, dahil gusto ko munang malaman if... well, I really feel naman talaga it's real. Gusto ko lang malaman how strong."
Si Kim naman: "Siguro mga 6. Wala, siguro may takot... may pagdududa... marami pa."
Tough Question No. 1: "In Entertainment Live, Kim, sinabi mo ang linyang ito: ‘Kasi nga love team kami, bakit pa siya naghahanap ng iba?' Ano ang ibig mong sabihin sa statement na ito?"
"Kasi po tinanong ako, bakit daw ako nagre-react sa ganun? Siyempre, love team kami. Kailangan naming pangalagaan yung mga fans namin. Siyempre, yung mga fans nagagalit din. Bakit may Pauleen, ganyan-ganyan... nali-link sa iba, ganyan-ganyan."
"Siyempre hindi lang naman as a love team, di ba? There are real emotions involved. Siyempre kasi, you won't be the love team as successful as you are kung wala talagang emotions involved na tumitibok sa puso n'yo," singit na pampakilig naman ni Kris.
Para pakiligin pa lalo ang fans, tinanong ni Kris si Gerald kung hanggang kailan kayang maghintay ni Gerald for Kim.
"I can wait until the day she says 'yes,'" sagot Gerald.
Hirit naman ni Kim, "Ang haba naman ng hair ko."
Balik ni Kris kay Kim, "So, ikaw, Kim, how long bago mo masagot back yung ‘I love you' niya? Eighteen ka na, so, mga 19, 20, 21 0r 22?"
"Hindi ko alam," sagot ng dalaga.
Pagpapaalala ni Kris, baka daw sa pagpapahintay ni Kim kay Gerald ay mawalan nang tuluyan ang dalaga ng mamahalin.
"Alam ko naman yun, e. Nasa isip ko naman na kung kami talaga, kami talaga. Kung hindi, hindi na."
Bago matapos ang segment ay nagbigay pa ng mensahe si Kris kay Gerald.
"You know, Gerald, I have to say this to you lang, kasi my opinion of you went up talaga because of this interview. Kasi you're so nice. Worried lang kasi ako for Kim as a girl, kasi we all love her, we all voted for her, we don't want you to hurt her. Pero ngayon nakita ko sa inyong dalawa, sincere ka, love mo siya. Thank you, Gerald."
At may pahabol na bilin pa si Kris kay Kim, "Ikaw, ha, baka mawala pa!"